ನಾನಿಲ್ಲದಿದ್ದರೂ ಬಾನಿಹುದು ನೋಡ
ತಾನನದ ದನಿಯಿಹುದು ಎಲ್ಲೆಲ್ಲೂ ಕೇಳ
ನಾಳೆಗಳ ಎಣಿಕೆಯಲಿ ಈ ಕ್ಷಣವ ಮರೆತರೂ
ಕಾಲತಾಳಕೆ ಮಳೆಯು ಸುರಿಯುವಂತೆ
ಜಲಮೂಲಗಳಿಗೆಲ್ಲ ವಿಷವುಣಿಸುತಿದ್ದರೂ
ಇಳೆಯೆಡೆಗೆ ನೀರದನು ಜಾರುವಂತೆ
ತಾರೆಗಳ ತೋಟಕ್ಕೆ ಮೇರೆಯಿಲ್ಲವಾದರೂ
ಯಾರೋ ಎಲ್ಲವನೂ ಕಾಯುವಂತೆ
ಆ ರವಿಯ ಕಿರಣಗಳು ಸರಿಗಮದ ನಡೆಯಲ್ಲಿ
ಸ್ವರದ ಭಾವಕೆ ಬಳುಕಿ ಬಾಗುವಂತೆ
ಇದೆ ನೋಡು ಈ ಜಗವು ಲಯಬದ್ಧ ಹಾಡಂತೆ
ಪದವೊಂದು ಅಂಕುರಿಸಿ ಬೆಳೆದು ಬೆಳೆದು
ಎದೆಯುಸಿರ ತಾ ತುಳಿದು ಬಾನಗಲ ಸಂಚರಿಸಿ
ನಾದದಲೆಯಲಿ ತೇಲಿ ನಲಿಯುತಿಹುದು
ಡಿ.ನಂಜುಂಡ
21/07/2014
