ಹಬ್ಬಗಳಾವಳಿ

ಆಹಾ! ಬಂದಿತು ಹಬ್ಬಗಳಾವಳಿ;ಮನೆಮನೆಯಲಿ ಸಂಭ್ರಮಕೇಲಿ

ಅಡುಗೆಯ ಪಾತ್ರೆಗಳಾಡುತಿರೋಕುಳಿ ವಿಧವಿಧ ಷಡ್ರಸಪಾಕದಲಿ 

ಮನವಿರೆ ಯೋಗಸಮಾಧಿಯಲಿ;ಸವಿ ಭೋಜನಸಂಸಿದ್ಧಿಯಲಿ

ಪಂಚೇಂದ್ರಿಯಗಳು ಒಂದೆಡೆಗೂಡಿವೆ;ಒಬ್ಬಟ್ಟಿನ ರುಚಿಕಟ್ಟಿನಲಿ

ಸಾರೊಳಗದ್ದಿಹ ಸೌಟಿನ ಸದ್ದಿಗೆ ಕಿವಿಗಳು ಎದ್ದೆದ್ದೇಳುತಿವೆ;

ರುಚಿರುಚಿಯಡುಗೆಗಳೂಟದ ಚಪಲಕೆ ರಸನದಿ ಜಲವೊಸರುಕ್ಕುತಿದೆ

ಹೊಟ್ಟೆಯು ಚುರುಗುಟ್ಟುತಿದೆ;ತೇಗುವ ಕ್ಷಣಗಳನೆಣಿಸುತಿದೆ

ಉದರದೊಳಗ್ನಿಯ ಜ್ವಾಲಾಮಾಲೆಯು ಯಾಗಸಮಾಪ್ತಿಗೆ ಕಾಯುತಿದೆ

ಅಟ್ಟದ ಮೇಲಿನ ಡಬ್ಬದೊಳಿಟ್ಟಿಹ ಹಪ್ಪಳಗಳು ಕೆಳಗಿಳಿಯುತಿವೆ

ಕುದಿಯುವ ಎಣ್ಣೆಯ ಬಾಣಲೆಯೊಳಗಡೆ ಮುಳುಗುತಲೇಳುತಲುಬ್ಬುತಿವೆ

ಬಾಳಕಗಳು ಗರಿಯಾಗುತಿವೆ; ಬಾಯೊಳಗಿಳಿಯಲು ಕಾಯುತಿವೆ

ತರತರ ಹೊಸ ತರಕಾರಿಗಳೆಲ್ಲವು ಹದದುರಿಯೊಲೆಯಲಿ ಬೇಯುತಿವೆ

ಮೊಳಕೆಗÀಳೊಡೆದಿಹ ಬಗೆಬಗೆ ಕಾಳ್ಗಳು ಗಜ್ಜರಿತುರಿ ಜೊತೆಗೂಡುತಿವೆ

ಹಸಿಮೆಣಸಿನ ತುಣುಕುಗಳೊಂದಿಗೆ ತೆಂಗಿನ ಸಂಗದೊಳಾಡುತಿವೆ

ಲಿಂಬೆಯ ರಸವನು ಹೀರುತಿವೆ; ಸಾಸಿವೆಗಳು ಚಟಪಟಿಸುತಿವೆ

ಹಸಿ ಕೊತ್ತಂಬರಿ ಸೊಪ್ಪುಗಳಂದದಿ ಕೋಸಂಬರಿಯನು ಚುಂಬಿಸಿವೆ

ಬಂದಿತು ಕ್ಷಣವೊಂದಿನಿತೂ ಕಾಯದೆ ತುಪ್ಪದ ಘಮಘಮವೂಡುತಲಿ.

ಅಡುಗೆಯ ಮಂಗಳವಾದ್ಯದ ಸದ್ದಿರೆ ಸಟ್ಟಗದೊಳಮೈಕಟ್ಟಿನಲಿ

ತಂದಿಟ್ಟಿಹ ಹೊಸ ಬಟ್ಟಲಲಿ; ಕೈಬಾಯ್ಗಳ ಒಗ್ಗಟ್ಟಿನಲಿ

ಒಂದರ ಮೇಲೊಂದಡಿಗೆಗಳೆಲ್ಲವು ಉದರದೊಳಿಳಿದಿವೆ ಸರದಿಯಲಿ.

ಡಿ.ನಂಜುಂಡ

04/10/2015

ಝೇಂಕಾರ

ಹೂವಿನಧರದ ಮಧುವು ಜಾರಿ ಹೋಗದ ಹಾಗೆ

ಹೀರಲಾತುರ ತೋರಿ ಹಾರುತಿರೆ ದುಂಬಿ

ಹೃದಯಕುಸುಮದ ಜೇನ ಚಿತ್ತಭ್ರಮರವು ಬಯಸಿ

ಝೇಂಕರಿಸಿ ಹಾಡುತಿದೆ ಎದೆಯ ತುಂಬಿ

ಭಾವವದು ಬಾನಗಲ ಬಾಗಿ ತಾ ಬಿಲ್ಲಾಗಿ

ಸಪ್ತವರ್ಣಗಳಾಗಿ ಚಿತ್ರವಾಗೆ

ಓಂಕಾರನಾದಾಂತದಕ್ಷರಾಲಿಂಗನಕೆ

ರಸನದಿಂ ಪದಗಳಭಿಷೇಕವಾಗೆ

ಸಪ್ತಾಗ್ನಿಜಿಹ್ವೆಗಳಲಾ ವಾಣಿ ಪ್ರಜ್ವಲಿಸಿ

ಕಣಕಣದಲನುರಣಿಸಿ ಗೀತವಾಗೆ

ಸೃಷ್ಟಿಯಾನಂದರಸಪರಿಪಾಕಪೂರ್ಣತೆಯ

ಸಂಕಲ್ಪಸಂಚಾರದಾಲಾಪವಾಗೆ

ಆಕಾಶದಾದ್ಯಂತ ಮಧ್ಯಾಂತರಾಲದೊಳು

ಭಾವವರ್ಣವು ಕಮಲದಲಗಳಾಗೆ

ಸುಮನಾಲದಾಂತರ್ಯ ಮಧುರಸಾಸ್ವಾದನೆಯು

ಚಿತ್ತಷಟ್ಪದದಿಷ್ಟವೃತ್ತಿಯಾಗೆ

ಡಿ.ನಂಜುಂಡ

21/09/2014

ಸುಂದರ!

ಬಕ್ಕ ತಲೆಯ ಚೆಲುವ ನೋಡೆ

ಎಂಥ ಸುಂದರ!

ಮೀಸೆ ತಿರುವಿ ಹುರಿಯ ಮಾಡೆ

ಎಂಥ ಬಂಧುರ!

ಅಗೋ! ನೋಡು ನಡಿಗೆಯಂದ;

ದಾಪುಗಾಲನಿಡಲು ಚಂದ;

ಎಲ್ಲಕಿಂತ ಅಂದವವನ

ಗಟ್ಟಿ ಬಾಹುಬಂಧ.

ಹಣೆಯ ಮೇಲೆ ನೆರಿಗೆ ಮೂಡೆ;

ಮೂಗ ತುದಿಗೆ ಬೆವರ ನೋಡೆ;

ಎಂಥ ಚಂದ! ಚಿಂತೆಗಳನು

ಗುನುಗಿ ಗುನುಗಿ ಹಾಡೆ.

ಗಡಸು ದನಿಯ ಮಾತುಗಳನು

ಕೇಳಲೆಂಥ ಚಂದ;

ಸಿಡುಕು ಮಾಡೆ ಕಣ್ಣ ತುದಿಯ

ಕೆಂಪು ನೋಡಲಂದ.

ಡಿ.ನಂಜುಂಡ

10/08/2014

ಭಾವವರ್ಣ

ಯಾವ ಭಾವದ ಬಣ್ಣದೋಕುಳಿ

ಹೂವಿನಂದದಿ ಬೆರೆಯಿತು?

ಯಾವ ಹೂವಿನ ಚಂದವಾರಿಸಿ

ಭಾವಬಿಂಬವು ತುಳುಕಿತು?

ಮೊಲ್ಲೆ ಹೂಗಳ ನಗುವಿನಂದವು

ನಲ್ಲೆಯಾ ಮೊಗವಾಯಿತೆ?

ಚೆಲ್ಲುತಿರೆ ಬೆಳ್ನೊರೆಗಳೆಲ್ಲವು

ಗಲ್ಲವನು ಪಿಡಿದೆತ್ತಿತೆ?

ಕೆಂಗುಲಾಬಿಯು ಮುಡಿಗೆ ಬಂದು

ರಂಗುಗೆನ್ನೆಯೊಳಿಳಿಯಿತೆ?

ಅಂಗಳದ ಕೆಂದುಂಬೆ ನತ್ತದು

ಮಂಗಳವನೈತಂದಿತೆ?

ಎದೆಗೆ ಬಿದ್ದಿಹ ಪದಗಳೆಲ್ಲವು

ಹೃದಯದೊಳು ಜಿನುಜಿನುಗಿತೆ?

ಸದಭಿರುಚಿಸುಮವರ್ಣವರ್ಣವು

ನಾದಮೂಲದೊಳಡಗಿತೆ?

ಡಿ.ನಂಜುಂಡ

06/08/2014

ಸೋಲೇ ಗೆಲುವಿನ ಸೋಪಾನ

ಸೋಲೇ ಗೆಲುವಿನ ಸೋಪಾನ

ಬಾಳೊಳು ಅದುವೇ ಸಂಮಾನ

ಅಡಿಗಡಿಗೆಡುವುತ ಮುನ್ನಡಿಯಿಟ್ಟರೂ

ನಡತೆಯು ಒಳಿತಿರಲವ ಜಾಣ

ಗಡಿಬಿಡಿಯಿಂದಲಿ ತಡವರಿಸಿದರೂ

ನುಡಿಗಳು ಶುಚಿಯಿರಲದೆ ಮಾನ

ಮದ್ಯದ ಅಮಲಲಿ ಪದಗಳನಾಡುತ

ವಿದ್ಯೆಯ ಬೋಧಿಸೆ ಅವಮಾನ

ಗದ್ದಲ ತುಂಬಿರೆ ಮನದಾಳದೊಳಗೆ

ಬುದ್ಧಿಯಿರುವುದೇ ಅನುಮಾನ

ಬಿದ್ದವನೇಳದೆ ಮಲಗಿಯೆ ಇದ್ದರೆ

ಸದ್ಯವೆ ಸೋಲಿದೆ ತಿಳಿ ಜಾಣ

ಬಿದ್ದವನೇಳುತ ಗೆಲುವೆಡೆಗಡಿಯಿಡೆ

ಬುದ್ಧನ ಪದವಿಗೆ ಸೋಪಾನ

ಡಿ.ನಂಜುಂಡ

05/08/2017

ಮಳೆ

ಕಾರ್ಮೋಡಗಳೋಡೋಡುತ ಬರುತಿವೆ, ಮಲೆನಾಡಿನ ದಟ್ಟಡವಿಯ ನೋಡಿ

ಕಡಲಲೆಯುಬ್ಬರವೆಲ್ಲವನೆಳೆದೆಳೆದಾಡುತಲಬ್ಬರದೊಡಗೂಡಿ

ಹೆಮ್ಮರಗಳು ಜಿಗಿದಾಡುತಿವೆ; ಗಿಡಗಳು, ದಡಿಗಳು ಬಾಗುತಿವೆ

ಜಡಿಮಳೆಯಾರ್ಭಟತಾಂಡವನಟನೆಯ ನೀರಾಟಕೆ ತಲೆಯೊಡ್ಡುತಿವೆ

ಚಂಡಾಕಾರದಿ ಬೀಸುವ ಗಾಳಿಗೆ ಮರಗಳ ಹರೆಗಳು ಮುರಿಯುತಿವೆ

ಹಸಿರೆಲೆಗಳು ನುಜ್ಜಾಗುತಲುದುರಿವೆ; ಹರಿಯುವ ನೀರಲಿ ತೇಲುತಿವೆ

ಕೆಮ್ಮಣ್ಣಿನ ಕಣಗಳೊಡೆಯುತಿವೆ; ಹೊನಲಿಗೆ ಸೀರೆಯನುಡಿಸುತಿವೆ

ಹಸಿರೆಲೆಪುಡಿಗಳು ಹೊಳೆಯುಡುಗೆಯ ಹೊಸ ಮೆರುಗಿನ ಚಿತ್ರಗಳಾಗುತಿವೆ

ಭೋರ್ಗರೆಯುತ ಜಿಗಿದಿರೆ ನೀರ್ಕೋಡಿ; ಕಾರ್ಗಲ್ಲಿನ ಶಿವನೆಡೆಗೋಡಿ

ಬೆಳ್ನೊರೆ ನಗುಮೊಗವುಕ್ಕಿಹ ಗಂಗೆಯು ಅವತರಿಸಿಹಳಲ್ಲಿಯೆ ನೋಡಿ

ಆಹಾ! ಮಳೆ! ಮಳೆ! ಬಿರುಗಾಳಿ; ಸುಂಯ್ ಗುಡುತಿರಲಾ ಚಳಿಗಾಳಿ

ಹಕ್ಕಿಗಳೆಲ್ಲವು ಗೂಡನು ಸೇರಿವೆ,ಕಪ್ಪೆಗಳವು ವಟಗುಟ್ಟುತಿವೆ

ಮುದುರಿದ ಕೈಕಾಲದುರುತಿವೆ; ಕಂಬಳಿಗಳನೆಳೆದಾಡುತಿವೆ

ಕೋಣೆಯೊಳಡಗಿಹ ಮಕ್ಕಳ ಕೈಗಳು ಹಪ್ಪಳÀದಂಚನು ಮುರಿಯುತಿವೆ

ಮಲೆನಾಡಿನ ಮಳೆಗಾಲವು ಇಂತಿರೆ, ಎಲ್ಲವು ಪ್ರತಿಮೆಗಳಾಗುತಿರೆ

ಹಸಿರುಡೆಗಳನುಟ್ಟಂತಿಹ ಹೊಲಗಳ ಬಸಿರಲಿ ಮೊಳಕೆಗಳೊಡೆಯುತಿರೆ

ಬಗೆಬಗೆ ರೂಪದ ಪ್ರಕೃತಿಯಲಿ ಮೈಮನಗಳ ಲಯಗೊಳಿಸುತಲಿ

ಶ್ರಾವಣಮಾಸದ ಹಬ್ಬದ ಪೂಜೆಗೆ ಹರುಷದಲೆಲ್ಲವನರ್ಪಿಸಲಿ

ಡಿ.ನಂಜುಂಡ

02/08/2014