ಸೂರ್ಯೋದಯ

ಅತ್ತ ಮುಗಿಲಲಿ ಬೆಳ್ಳಿ ಮೂಡಿತು

ಕತ್ತಲುದರವು ಸೀಳಿತು

ಮತ್ತಕೋಕಿಲಚಾರುನಿಸ್ವನ-

ವಿತ್ತ ಬುವಿಯೊಳು ಮೊಳಗಿತು

ಕಂದನೋರ್ವನು ಕಣ್ಣ ಬಿಟ್ಟನು

ಬಂದನಾ ಗಿರಿಯೋರೆಗೆ

ಅಂದಚಂದದ ರಂಗನಿತ್ತನು

ಇಂದು ನಿನ್ನೆಯ ಸಂಧಿಗೆ

ಬಾನ ಮಲ್ಲಿಗೆ ಹೂವ್ಗಳೆಲ್ಲವು

ಬನದ ಮಾಳಿಗೆಗಿಳಿಯಲು

ಮೌನಗಾನದೊಳವಿತ ತಾನಕೆ

ಹನಿಗಳಾಡುತ ಕುಣಿಯಲು

ಎಲ್ಲ ಖೇಚರಗಳಿಗೆ ಕಾತರ

ಬೆಳಕ ಹಬ್ಬದ ಸಡಗರ

ಮೇಲೆ ಹಾರುವ ದೂರ ಸಾಗುವ

ಕಾಳ ಹೆರಕುವ ಆತುರ

ಕಾಲತಾಳಕೆ ಕುಣಿವ ವಿಶ್ವದ

ಮೂಲದಲ್ಲಿರೆ ಸೂತ್ರವು

ನಾಳೆಯಾಗುವ ಸೂರ್ಯನುದಯಕೆ

ಬೆಳಕು-ಕತ್ತಲ ಗಣಿತವು

ಡಿ.ನಂಜುಂಡ

22/10/2014

ಸಹಜ

ಚೆಲ್ಲದಿಹುದೆ ಪ್ರಕೃತಿಯೊಲವು

ಎಲ್ಲರೆದೆಯೊಳಿಳಿಯದೇ?

ಬೇಲಿಯೆಲ್ಲೆ ಮೀರಿ ಹೂವು

ಗಾಳಿಯನ್ನು ತೀಡದೇ?

ಮಣ್ಣ ಕಣದ ಸಾರವೆಲ್ಲ

ಹಣ್ಣ ತಿರುಳಿಗೇರದೇ?

ಬಣ್ಣದಳೆದ ಬುವಿಯ ಚೆಲುವು

ಕಣ್ಣ ಸೆಳೆಯದಿರುವುದೇ?

ಮಳೆಯ ಹನಿಗಳಿಳೆಗೆ ಜಾರಿ

ಬೆಳೆಯು ಬಾಗದಿರುವುದೇ?

ಆಳಕಿಳಿದ ಜಲವು ಮತ್ತೆ

ಮೇಲಕೇರಿ ಬಾರದೇ?

ಕಾಲದÀಳತೆಯನ್ನು ಮೀರಿ

ನಾಳೆಯಿಂದಿಗಿಳಿವುದೇ?

ಬಾಳ ಗಾಲಿಯರೆಗಳುರುಳಿ

ಇಳಿದು ಮೇಲಕೇರದೇ?

ಎಲ್ಲ ಬೇಕು ಎಂಬ ಸೊಲ್ಲಿ-

ಗೆಲ್ಲಿ ನಿಯತಲಯವಿದೆ?

ಸೋಲು ಗೆಲುವು ಬಾರದೆಂದೂ

ತಾಳನಿಯಮವಿಲ್ಲದೆ.

ಡಿ.ನಂಜುಂಡ

15/10/2014

ಬೆಳಕಿನ ಬಿಂಬ

ಬಿಳಿಯೊಳಗಿಳಿಯದೆ ಕಣ್ ಕಾಣುವುದೇ?

ಒಳದನಿಗೂಡದ ಪದವುಳಿಯುವುದೇ?

ಬಾನೊಳು ಬಾಗಿದ ಬಣ್ಣಗಳೇಳವು

ಬಳುಕುವ ಭಾವದಲಿಳಿಯುತಿವೆ

ಬೇಕುಗಳೆಲ್ಲದರೊಳಮೈಯಾಗಿಸಿ

ಬಿಂಬಕೆ ಮೋಹವ ತುಂಬುತಿವೆ

ಚಿತ್ತದಿ ಮೂಡುವ ಚಿತ್ರಗಳೆಲ್ಲವು

ಬತ್ತದ ಕನಸುಗಳಾಗುತಿವೆ

ತೀರದ ವಿಧವಿಧ ಬಯಕೆಗಳೆಲ್ಲವು

ಕವಿತೆಗಳೊಳದನಿಯಾಗುತಿವೆ

ಕಣ್ಣೊಳಗಿಳಿದಿಹ ವಸ್ತುಗಳೆಲ್ಲವು
ಕಾಮನಬಿಲ್ಲುಗಳಾಗುತಿವೆ

ಮುಗಿಯದ ಚಿತ್ರಗಳೋಕುಳಿಯಾಟಕೆ

ಪದಗಳು ಕುಣಿಕುಣಿದಾಡುತಿವೆ

ಬಣ್ಣಗಳೇಳವು ಬಿಳಿಯೊಳು ಬಾಗುತ

ಕಣ್ಣೊಳ ಬಿಲ್ಲಿನ ಶರವಾಗೆ

ಕಾಣುವುದೊಂದೇ ಬೆಳಕಿನ ಬಿಂಬವು

ಕನಸುಗಳೆಲ್ಲವು ಮರೆಯಾಗೆ.

ಡಿ.ನಂಜುಂಡ

11/10/2014

ಭೂಪ್ರಾರ್ಥನೆ

ಉತ್ತಿ ಎಮ್ಮಾಸೆಗಳ ಅಂಕುರದ ಒಳಗಿರ್ಪ

ಬತ್ತದಾ ಮಣ್ಣಿನೊಳ ಉತ್ಸಾಹಕ್ಕೆ ಶರಣು

ಅತ್ತಾಗ ತುತ್ತಿಡುವ ಸತ್ತಾಗ ಹೂತಿಡುವ

ನಿತ್ಯಪರಿಪೂರ್ಣತತ್ತ್ವಕ್ಕೆ ಶರಣು

ಓ ಭೂಮಿಮಾತೆ! ಸುಖಶಾಂತಿದಾತೆ!

ಅಭಯಪ್ರದಾತೆ!

ಆಕಾಶವಾಯ್ವಗ್ನಿಜಲಭೂತಸಂಶಕ್ತಿ-

ಯುಕ್ತಾತ್ಮಚೈತನ್ಯಸತ್ಯಸಂಗೀತೆ

ಭಕ್ತಿರಸಪರಮಾನ್ನನೈವೇದ್ಯಸಂಪ್ರೀತೆ

ಅಖಿಲಜಗಜೀವಕುಲಕೇಕೈಕ ಮಾತೆ

ಕಾಮಾದಿ ಷಡ್ವೈರಿ ದುಸ್ಸಂಗದಿಂದೆದ್ದ

ಮಮಕಾರಹವ್ಯಗಳನರ್ಪಿಸುವೆ ತಾಯೆ

ತಾಮಸಿಕ ಗುಣದೋಷದಾವರಣವನು ಹರಿದು

ಸಾಮರಸಗುಣಗಳಿಂದಾವರಿಸು ತಾಯೆ

ಆರೋಗ್ಯ ವೈರಾಗ್ಯ ಭವಯೋಗ್ಯ ಭಾಗ್ಯಗಳ

ಸಾರಥ್ಯದಿಂದಲೀ ರಥವು ಚಲಿಸುತಿರಲಿ

ಚರಯೋಗಸಂಸಿದ್ಧಭೋಗಸಂವೃದ್ಧಿಗಳು

ಪರಮಪದಸಂಬಂಧಸೂತ್ರದೊಳಗಿರಲಿ

ವರಭೂಮಿಮಾತೃಕೆಯ ಚರಣಗಳಲಿರಲಿ

ಡಿ.ನಂಜುಂಡ

08/10/2014

ಬಾ ಲಲಿತೆ!

ನಲಿನಲಿದಾಡುತ ಬಾ ಲಲಿತೆ!

ನಲವಿನ ಪೂವಿಡು ಭಾವಲತೆ!

ಚೆಲುವಿನ ಚಿಗುರಲಿ ಗೆಲುವಿನ ಗೆಲ್ಲಿಡು

ಮೊಲ್ಲೆಯ ಹೂನಗೆ ಚೆಲ್ಲಾಡು

ಒಲವಿನ ಕುಡಿಕುಡಿಮೇಲಡಿಯಿಡು ನೀ

ಗಲ್ಲದ ಕುಳಿಯೊಳಗೋಲಾಡು

ಕಣಕಣವರಳಿಸಿ ಜೇನ್ಮಳೆಹನಿಯಿಡು

ಕಣ್ಣೊಳು ದಿನಕರಕಿರಣವಿಡು

ದನಿಯೊಳು ಪದಸುಮಕೇಸರಗಳನಿಡು

ಮನಕಾನನದೊಳು ಸುಳಿದಾಡು

ವದನದಿ ಶ್ರೀಶಿವಮಂತ್ರದ ಝಣವಿಡು

ಪದದೊಳಗರ್ಥದ ಚಿತ್ರವಿಡು

ವಿಧವಿಧ ವರ್ಣಗಳಾಕೃತಿದಲವಿಡು

ಹೃದಯಸರೋಜದಿ ಕುಳಿತುಬಿಡು

ಡಿ.ನಂಜುಂಡ

07/10/2014

ಯಜ್ಞ

ಭಾವವೇ ಬಾ ಇಲ್ಲಿ ಭವಯೋಗಿಯಾಗು

ರವವಾಗಿ ಕಲವರಿತ ಕವಿತೆಯಾಗು

ಅಗೆಯಾಗಿ ಬಾಗು ಕಾಳ್ದೆನೆಯಾಗಿ ನೀ ತೂಗು

ಮೊಗದ ನಗುಹೂವಿನೊಳ ಮಕರಂದವಾಗು

ಸಾಗಿ ನೀ ಸಂಸಾರಕೃಷಿಭೂಮಿಫಲದೊಳಗೆ

ಜಗದಗ್ನಿಕುಂಡದೊಳು ನೈವೇದ್ಯವಾಗು

ಮುಗಿಲಾಗಿ ಮೇಲ್ಜಿಗಿದು ಮಳೆಯಾಗಿ ಕೆಳಗಿಳಿದು

ಬಗೆಬಗೆಯ ಜಲಮೂಲಚೈತನ್ಯವಾಗು

ಜಗದಗಲ ನೀ ಹರಡಿ ಝಗಮಗಿಪ ಬೆಳಕಾಗು

ಆಗಸದ ರವಿಯುದರಕಾಂತಿಯೊಳು ಬಾಗು

ಮಣ್ಣಾಗು ತರುಮೂಲಸಾರದೊಳು ಒಂದಾಗು

ಹಣ್ಣಿನೊಳ ತಿರುಳಾಗಿ ಪರಿಪಕ್ವವಾಗು

ಕಣ್ಣಾಗು ಕಷ್ಟಸುಖದಜ್ಞಾನರಾತ್ರಿಯಲಿ

ಅನ್ನರಸಕೋಶಾಗ್ನಿಪದಕೆ ಶರಣಾಗು

ಸೃಷ್ಟಿವೈವಿಧ್ಯಮಯವರ್ಣಾಂತರಾಲವದು

ದೃಷ್ಟ್ಯಾದಿ ಕರಣಗಳ ಗುರಿಯಾಗುತಿರಲಿ

ವ್ಯಷ್ಟಿಚಿಂತಿತವಸ್ತುವಿಷಯಾಜ್ಯಹುತವಾಗಿ

ಇಷ್ಟಿಪರಿಪೂರ್ಣತೆಯ ಸಂತುಷ್ಟಿಯಿರಲಿ

ಡಿ.ನಂಜುಂಡ

05/10/2014

ಹಬ್ಬಗಳಾವಳಿ

ಆಹಾ! ಬಂದಿತು ಹಬ್ಬಗಳಾವಳಿ;ಮನೆಮನೆಯಲಿ ಸಂಭ್ರಮಕೇಲಿ

ಅಡುಗೆಯ ಪಾತ್ರೆಗಳಾಡುತಿರೋಕುಳಿ ವಿಧವಿಧ ಷಡ್ರಸಪಾಕದಲಿ 

ಮನವಿರೆ ಯೋಗಸಮಾಧಿಯಲಿ;ಸವಿ ಭೋಜನಸಂಸಿದ್ಧಿಯಲಿ

ಪಂಚೇಂದ್ರಿಯಗಳು ಒಂದೆಡೆಗೂಡಿವೆ;ಒಬ್ಬಟ್ಟಿನ ರುಚಿಕಟ್ಟಿನಲಿ

ಸಾರೊಳಗದ್ದಿಹ ಸೌಟಿನ ಸದ್ದಿಗೆ ಕಿವಿಗಳು ಎದ್ದೆದ್ದೇಳುತಿವೆ;

ರುಚಿರುಚಿಯಡುಗೆಗಳೂಟದ ಚಪಲಕೆ ರಸನದಿ ಜಲವೊಸರುಕ್ಕುತಿದೆ

ಹೊಟ್ಟೆಯು ಚುರುಗುಟ್ಟುತಿದೆ;ತೇಗುವ ಕ್ಷಣಗಳನೆಣಿಸುತಿದೆ

ಉದರದೊಳಗ್ನಿಯ ಜ್ವಾಲಾಮಾಲೆಯು ಯಾಗಸಮಾಪ್ತಿಗೆ ಕಾಯುತಿದೆ

ಅಟ್ಟದ ಮೇಲಿನ ಡಬ್ಬದೊಳಿಟ್ಟಿಹ ಹಪ್ಪಳಗಳು ಕೆಳಗಿಳಿಯುತಿವೆ

ಕುದಿಯುವ ಎಣ್ಣೆಯ ಬಾಣಲೆಯೊಳಗಡೆ ಮುಳುಗುತಲೇಳುತಲುಬ್ಬುತಿವೆ

ಬಾಳಕಗಳು ಗರಿಯಾಗುತಿವೆ; ಬಾಯೊಳಗಿಳಿಯಲು ಕಾಯುತಿವೆ

ತರತರ ಹೊಸ ತರಕಾರಿಗಳೆಲ್ಲವು ಹದದುರಿಯೊಲೆಯಲಿ ಬೇಯುತಿವೆ

ಮೊಳಕೆಗÀಳೊಡೆದಿಹ ಬಗೆಬಗೆ ಕಾಳ್ಗಳು ಗಜ್ಜರಿತುರಿ ಜೊತೆಗೂಡುತಿವೆ

ಹಸಿಮೆಣಸಿನ ತುಣುಕುಗಳೊಂದಿಗೆ ತೆಂಗಿನ ಸಂಗದೊಳಾಡುತಿವೆ

ಲಿಂಬೆಯ ರಸವನು ಹೀರುತಿವೆ; ಸಾಸಿವೆಗಳು ಚಟಪಟಿಸುತಿವೆ

ಹಸಿ ಕೊತ್ತಂಬರಿ ಸೊಪ್ಪುಗಳಂದದಿ ಕೋಸಂಬರಿಯನು ಚುಂಬಿಸಿವೆ

ಬಂದಿತು ಕ್ಷಣವೊಂದಿನಿತೂ ಕಾಯದೆ ತುಪ್ಪದ ಘಮಘಮವೂಡುತಲಿ.

ಅಡುಗೆಯ ಮಂಗಳವಾದ್ಯದ ಸದ್ದಿರೆ ಸಟ್ಟಗದೊಳಮೈಕಟ್ಟಿನಲಿ

ತಂದಿಟ್ಟಿಹ ಹೊಸ ಬಟ್ಟಲಲಿ; ಕೈಬಾಯ್ಗಳ ಒಗ್ಗಟ್ಟಿನಲಿ

ಒಂದರ ಮೇಲೊಂದಡಿಗೆಗಳೆಲ್ಲವು ಉದರದೊಳಿಳಿದಿವೆ ಸರದಿಯಲಿ.

ಡಿ.ನಂಜುಂಡ

04/10/2015