ಕೊಳ್ಳುಬಾಕ

ಕೊಂಡವಸ್ತುಗಳೆಲ್ಲ ಸ್ಥಳಪೂರ್ತಿ ಆಕ್ರಮಿಸಿ

ನಿಲ್ಲಲೂ ನೆಲೆಯಿಲ್ಲ ಮನೆಗಳೊಳಗೆ

ಆದರೂ ನಿಲ್ಲದದು ಕೊಳ್ಳುವಿಕೆಯಾರ್ಭಟವು

ತೃಪ್ತಿಯೊಂದಿನಿತಿಲ್ಲ ಮನಗಳೊಳಗೆ

ಬಂದಿಹುದು ಇಂದಲ್ಲಿ ವಿಧವಿಧದ ವಸ್ತುಗಳು

ಮನದಣಿಯೆ ನೋಡೋಣ ಎಂದುಕೊಂಡು

ಅಂಗಡಿಗೆ ಹೋದೊಡನೆ ದೋಚಿದಂತೆಯೆ ಬಾಚಿ

ಮನೆಗೆ ತಂದಿಹ ನೋಡಿ ಕೊಂಡುಕೊಂಡು

ಕೊಳ್ಳುವಾಸೆಯು ನುಸುಳಿ ಮನದಗಲ ಕುಣಿದಾಡೆ

ಕೊಂಡು ತರುತಿಹ ದಿನವೂ ಒಂದೊಂದು ಸರಕ

ಒಂದರಾ ಮೇಲೊಂದು ಇಟ್ಟರೂ ಸಾಲದಿಹ

ಸರಕುಗಳೇ ತುಂಬಿರುವ ಮನೆಯೊಂದು ನರಕ

ಡಿ.ನಂಜುಂಡ

18/06/2015

ಶರಣಮಹಂ

ಶರಣಮಹಂ ಶರಣಮಹಂ ಸರ್ವಮಂಗಳಾಂಗನೇ

ಪಂಚಕರಣಪೂರ್ವಶರಣಮಹಂ ಸುಂದರಾನನೇ

ಸರ್ವರೂಪವರ್ಣಮಯಪ್ರಕೃತಿಕಾರ್ಯಕಾರಣಿ

ನಿತ್ಯಹರಿದ್ವರ್ಣವಿಪಿನಪುಷ್ಪಗಂಧಧಾರಿಣಿ

ಅನ್ನಸತ್ವಪೂರ್ಣಪೃಥ್ವಿಗರ್ಭಬಿಂದುಪಾಲಿನಿ

ನೀಲಮೇಘಭಾರವಾಹಪವನಚಿತ್ತಚಾಲಿನಿ

ಬಾಲಸೂರ್ಯಕಿರಣಪೂರ ಹಿಮಮಣಿಗಣಮಾಲಿನಿ

ಸುಂದರೇಂದುಹಾಸಬಂಧಪರ್ವತಾಗ್ರಚಾರಿಣಿ

ಕಾಕಕೋಕಿಲಾದಿ ನಿಖಿಲ ಖೇಚರಾತ್ಮರೂಪಿಣಿ

ಅಖಿಲವಿಶ್ವವ್ಯಾಪಿನಿ ಸಕಲದುಃಖನಾಶಿನಿ

ಜನನಮರಣಜರೇತ್ಯಾದಿ ಸರ್ವಭಯಾಪಹಾರಿಣಿ

ಡಿ.ನಂಜುಂಡ

17/06/2015

ಆಶಯ

ಬಾನಿನಗಲ ಮನವ ಚಾಚಿ

ಧ್ಯಾನಿಯಾಗಬೇಕು

ಗಾನಜಲಧಿಯಾಳಕಿಳಿದು

ಮೌನಿಯಾಗಬೇಕು

ಮತಿಯು ಮಥಿಸಿದಂತ ಮಾತು

ಋತಪಥದಲಿ ಸಾಗಬೇಕು

ಶ್ರುತಿಯ ಹಾಗೆ ಪ್ರತಿಪದವೂ

ಮಿತಗತಿಯಲಿ ತೇಲಬೇಕು

ಜನನಮರಣತತ್ತ್ವಜ್ಞಾನ-

ಮನನವಾಗಬೇಕು

‘ನಾನು’ ಎಂಬ ಪರಮಶತ್ರು-

ಹನನವಾಗಬೇಕು

ಜನಗಣಮನಗುಣಗಳೆಲ್ಲ

ವನದಿನಿದನಿಯಾಗಬೇಕು

ಮನೆಮನೆಗಳ ಮೇರೆ ಮೀರಿ

ಬಾನ್ದನಿಯಲಿ ಬಾಗಬೇಕು

ತಾನನವೇ ತಾನಾಗಬೇಕು.

ಡಿ.ನಂಜುಂಡ

29/05/2015

ಹೃದಯದೊಳಡಿಯಿಡು ಗೋಪಾಲ

ಹೃದಯದೊಳಡಿಯಿಡು ಗೋಪಾಲ ನೀ

ಪದುಮದಿ ಮಧುವಿಡು ಬಾ ಬಾಲ

ಪದಪದದುಸಿರನು ಬಿದಿರೊಳು ತೇಲಿಸಿ

ನಾದವ ತುಂಬಿಸು ವನಮಾಲ

ವನಖಗಜಲಭೂಚರಗಳ ಇಂಚರ-

ದನುರಣವೆನ್ನೆದೆಯೊಳಗಿರಿಸು

ಚಣಚಣವೂ ಮರದೆಲೆಗಳ ಹಸಿರನು

ಕಣಕಣದೊಳು ನೀ ತಂದಿರಿಸು

ಭೂಜಲವಾಯ್ವಾಕಾಶಾನಲಗಳ

ಭಜಿಸುವ ಭಾವವ ಒಳಗಿರಿಸು

ಕುಜಗುರುಬುಧಶನಿರವಿಶಶಿಶುಕ್ರರ

ಪೂಜಿಪ ಮತಿಯನು ಪತಿಕರಿಸು

ಡಿ.ನಂಜುಂಡ

24/04/2015

ತರುದೇವತೆ

ಬೇಸಿಗೆಯ ಬೆಂಗಾಡ ಬೇಗೆಯಲಿ ಬಸವಳಿಯೆ

ನೆರಳನೀಯುತ ಬಯಲ ಒಂಟಿ ಮರವು;

ತರಗೆಲೆಯ ತಳಹಾಸ ತಂಪಿತ್ತು ಹರಸುತಿರ-

ಲೆನಗೇಕೆ ಬೇಕು ಮತ್ತೊಂದು ವರವು

ಆ ಮರದ ಹಸಿರೆಲ್ಲವೆನ್ನುಸಿರ ಜಸವಾಗಿ

ಕಣಕಣದಿ ಹೊಸ ಹುರುಪಿನರಳ ಕುಣಿಸಿ

ಉಲ್ಲಾಸದಾ ಮಂದಹಾಸವನು ತಂದಿರಿಸಿ

ಎದೆಯಗಲ ನುಡಿಯಿಂಪ ಕಂಪ ಸೂಸಿ

ಬಿಸಿಲ ಬೆಂಕಿಯ ಹೊತ್ತು ತಂಪೆರವ ತರುದೇವಿ-

ಯವತರಿಸಿ ಆನಂದಸುಧೆಯ ತರಲು

ಅದಕಿಂತ ಬೇರಾವ ದೇವತೆಯ ನಾ ಕಾಣೆ

ಮನಸುಮವನನುದಿನವು ಅಡಿಗಿರಿಸಲು.

ಡಿ.ನಂಜುಂಡ

04/04/2015

ನಿವೇದನೆ

ಓಡಬೇಡವೆಲೆ ಕಾಲ! ಮನವು ಓಡುವ ಹಾಗೆ

ಎಡಬಿಡದೆ ನನ್ನೊಡನೆ ಮೆಲ್ಲನಾಡುತಿರು

ಸಡಗರದಿ ನಾನಿರಲು ನೀ ಮುಂದೆ ಹೋಗದಿರು

ಕಾಡುವಾ ಬೇಸರಕೆ ವೇಗಗುಂದದಿರು

ಕಷ್ಟವದು ಬಂದಾಗ ಮನವ ಮುಂದೆಳೆದು ನೀ-

ನಿಷ್ಟವಿರೆ ಹಿಂದೆಳೆದು ಸಂತುಲನಗೊಳಿಸು

ಸೃಷ್ಟಿತಾಳಕೆ ನಲಿವ ವಿಶ್ವದೃಷ್ಟಿಯ ಹಾಗೆ

ವ್ಯಷ್ಟಿರೂಪದೊಳೆನ್ನ ಸಂತುಷ್ಟಿಗೊಳಿಸು

ಹೂವರಳಿ ಕಾಯಾಗಿ ಪಕ್ವವಾಗುವ ಹಾಗೆ

ಜೀವನದ ಅನುಭವವು ತಾ ಮಾಗುತಿರಲಿ

ಭವಕರ್ಮಕೃತಫಲವು ತೊಟ್ಟು ಕಳಚುತಲುದುರಿ

ಶಿವಧ್ಯಾನದಾನಂದಮೌನವೊಂದಿರಲಿ

ಡಿ.ನಂಜುಂಡ

30/03/2015

ರಾಮನಾಮಮದ್ಯಪಾನ

ರಾಮನಾಮದಮಲಿನಲ್ಲಿ

ತೇಲುತಿಹಳೆ ಜಾನಕಿ?

ರಾಮಹೃದಯಕಮಲನಾಲ-

ಮಧುವಾದಳೆ ಜಾನಕಿ?

ಮದವೇರಿದ ಚಿತ್ತದೊಳಗೆ

ಪಿತ್ತರಸವನಿಟ್ಟಳೇ?

ಹತ್ತು ತಲೆಗಳೊಳಗೆ ನೂರು

ಕಲ್ಪನೆಗಳ ಹೆತ್ತಳೇ?

ವನವನಗಳನಲೆದು ಅಲೆದು

ಗೆಡ್ಡೆಗೆಣಸನಾಯ್ದಳೇ?

ಬಂಗಾರದ ಮೋಹದಿಂದ

ಜಿಂಕೆಗೆ ಮನಸೋತಳೆ?

ಕಾಮರೂಪಕನಕಮಯ

ಲಂಕೆಯನ್ನು ಸುಟ್ಟಳೆ?

ರಾಮಚರಿತಮಾನಸಕ್ಕೆ

ಮತ್ತೆ ಪುಟವನಿಟ್ಟಳೇ?

ರಾಮಮಹಾನ್ವೇಷಣೆಯಲಿ

ನಾವೆಲ್ಲರೂ ಹನುಮರೇ?

ರಾಮಾಯಣದರ್ಶನದಲಿ

ನಾವೆಲ್ಲರೂ ಋಷಿಗಳೇ?

ಡಿ. ನಂಜುಂಡ

29/03/2015