ಉಳುಮೆ ಮಾಡು

ಉಳುಮೆ ಮಾಡು ರಂಗ! ಬಾರೋ

ಉಳುಮೆ ಮಾಡೋ

ಚಿತ್ತಭೂಮಿಯುತ್ತಿ ಬಿತ್ತಿ

ಬೆಳೆಯ ತೆಗೆಯೋ

ಎಲ್ಲ ಬೇಕು ಎಂದು ಬಯಸಿ

ಸಾರ ಕಳೆದುಕೊಂಡ ಎನ್ನ

ಚಿತ್ತಭೂಮಿಯನ್ನು ಬೇಗ

ಸತ್ತ್ವಗೊಳಿಸೋ

ಕರಣಗಳನು ಮಣ್ಣುಗೊಳಿಸಿ

ಮನವÀ ನೀರಿನಂತೆ ಉಣಿಸಿ

ಚಿತ್ತಭೂಮಿಯನ್ನು ದಿನವೂ

ಉಳುಮೆ ಮಾಡೋ

ಉಳುಮೆಯಿಂದ ಬಂದ ಕಾಳ

ಹೆಕ್ಕು ಬಾರೋ ಒಕ್ಕು ಬಾರೋ

ಎದೆಯ ತುಂಬ ಸುಗ್ಗಿ ಹಾಡಿ

ಕುಣಿದು ಬಾರೋ

ಡಿ.ನಂಜುಂಡ

14/07/2015

ಮಲೆನಾಡ ಅಡವಿ

ಮಲೆನಾಡಿನಡವಿಯೊಳಗಲೆದಾಡು ಕುಣಿದಾಡು

ಒಲವ ಪ್ರತಿಮೆಗಳನೀನಲ್ಲಿ ನೋಡು 

ಚೆಲುವು ಚಲಿಸುವ ಕಾಡು ಲಲಿತ ಕಲೆಗಳ ಬೀಡು

ನಲವು ತಾನಲ್ಲಿ ನೆಲೆಸೆ ಎದೆತುಂಬಿ ಹಾಡು

ಎಲೆಗಳಲಿ ತಳಹಾಸಿ ಕೈಬೀಸಿ ಕರೆಯುತಿದೆ

ಫಲವಿರಿಸಿ ರೆಂಬೆಗಳನಿಳೆಗೆ ತಾಗಿಸಿದೆ

ಹೊಳೆ ತಾನು ಕೆಳ ಹಾರಿ ನಗೆಮೋರೆಯನು ತೋರಿ

ತಲೆಮೇಲೆ ಜಲವೆರಚಿ ಶುಭವ ಹರಸುತಿದೆ

ತಂಗಾಳಿಯನು ಬೀಸಿ ಹಸಿರುಸಿರನೆಮಗಿತ್ತು

ಅಂಗಾಂಗಗಳಿಗೆಲ್ಲ ಹುರಪನೂಡಿಸಿದೆ

ರಂಗುರಂಗುಗಳಲ್ಲಿ ನವಿಲುಗಳ ಸಿಂಗರಿಸಿ

ಶೃಂಗಾರಭಾವಗಳ ಕರೆದು ಕುಣಿಸುತಿದೆ

ಬೀಳುಗೀಳುಗಳಲ್ಲಿ ಮೇಲಮೇಲಕೆ ಸಾಗಿ

ಬಾಳ ಬೀಳನು ಮರೆವ ಆಟಗಳನಾಡು

ಆಲಬೇಲಗಳಲ್ಲಿ ನಾಳೆಯೇಳ್ಗೆಯ ಕಂಡು

ಬಾಲಬಾಲರ ಮುಂದೆ ನಾಡ ಕೊಂಡಾಡು.

ಡಿ.ನಂಜುಂಡ

12/07/2015

ಏಕೆ?

ಹಲಸಿನ ಹಣ್ಣಿನ ಮೇಣಕೆ ಅಂಟಿದ

ನೊಣದಂತಿರುವಾ ಮನಸೇಕೆ?

ಬಿಡಲೂ ಆಗದ ಬಿಡುಗಡೆಯಾಗದ

ಆಸೆಯ ನಂಟಿನ ಹಂಗೇಕೆ? 

ನಾಳೆಯ ನೋವ್ಗಳನಿಂದೇ ಚಿಂತಿಸಿ

ಆನಂದವ ಮುಂದೂಡುವುದೇಕೆ?

ಸಾವಿನ ಅಪ್ಪುಗೆ ನಿಶ್ಚಿತವಾದರೂ

ತ್ಯಾಗಕೆ ಈ ಮನವೊಪ್ಪದು ಏಕೆ?

ಬೆವರಿಲ್ಲದೆಯೇ ಬಂದಿಹ ಸೊತ್ತನು

ಭೋಗಿಸಿ ಸುಖಿಸಲು ಹಿಗ್ಗುವುದೇಕೆ?

ಮೈಮನವೊಗ್ಗಿಸಿ ಬಾಗಿಸಿ ದುಡಿದಿಹ

ಅನ್ನವನುಣ್ಣಲು ಅಳುಕೆಮಗೇಕೆ?

ಡಿ.ನಂಜುಂಡ

05/07/2015

ಹಲಸಿನ ಸಂತೆ

ಯೋಗದ ಕಠಿಣತೆಯೊಗ್ಗದು ಮನಸಿಗೆ

ಬಗ್ಗದು, ಬಳುಕದು ಕೈಕಾಲು

ಹೋಗುವ ಬನ್ನಿರಿ ಹಲಸಿನ ಸಂತೆಗೆ

ಭೋಗದ ಅರಮನೆಗಡಿಯಿಡಲು

ಬಿಸಿಬಿಸಿ ಹಲಸಿನ ದೋಸೆಗಳು

ಹಿಸಿದಿಹ ಬಿಡಿಬಿಡಿ ಹಣ್ಣುಗಳು

ಎಳೆಯರ ಗಮನವ ಕೂಡಲೆ ಸೆಳೆಯುವ

ಎಳೆದೊಳೆಗಳ ಮಂಚೂರಿಗಳು

ಕುದಿಯುವ ಎಣ್ಣೆಯ ಆಳಕೆ ಇಳಿದು

ಬಾಣಲೆಯುದ್ದಗಲಕೆ ಹರಿದು

ತೇಲಾಡುತಲಿವೆ ರುಚಿ ಮೂಳಕಗಳು

ಸುಂದರ ಸಂಜೆಯ ಕೆಂದೆಳೆದು 

ಮೆಲ್ಲಿರಿ ಹಲಸಿನ ಹಣ್ಣಿನ ಬಗೆಗಳ

ರುಚಿಕರ ಹಪ್ಪಳ ಚಿಪ್ಸುಗಳ

ಮರೆಯಿರಿ ಮೈಕೈ ನೋವುಗಳ

ಸವಿಯುತ ಬಿಸಿಬಿಸಿ ಖೀರುಗಳ

ಕೊಬ್ಬಿದ ದೇಹವನುಬ್ಬಿಸಿ ನಡೆಯಿರಿ

ಹಲಸಿನ ಹಬ್ಬದ ಲಘುಬಗೆಗೆ

ರುಚಿಗಳನೆಲ್ಲಾ ದಬ್ಬಲು ಉದರಕೆ

ನುಗ್ಗಿರಿ ಒಮ್ಮೆಲೆ ಪ್ರಾಂಗಣಕೆ.

ಡಿ.ನಂಜುಂಡ

29/06/2015

ಯೋಗ

ಸಂಸಾರಸುಖಭೋಗಸಂತ್ರಸ್ತ್ರ ಎಲೆ ಮನವೆ!

ದುಸ್ಸಂಗದಿಂದೆದ್ದ ದುಃಖಗಳ ತ್ಯಜಿಸು

ವೈರಾಗ್ಯಸಂಸಿದ್ಧಯೋಗದಲಿ ನೀ ಪಳಗು

ಸೃಷ್ಟ್ಯಾದಿಬಂಧವನು ನಿತ್ಯವೂ ಭಜಿಸು

ಅದು ಬೇಕು ಇದು ಬೇಕು ಎಂಬುದುನು ಬದಿಗೊತ್ತಿ

ಬದುಕಿನಲಿ ಬಂದುದನು ಮೊದಲು ಸ್ವೀಕರಿಸು

ಸಾಕೆಂಬ ತತ್ತ್ವವಿರೆ ಸಾಕಾರಕಿಲ್ಲ ಬೆಲೆ

ನಿರಾಕಾರ ನಿರ್ವಚನ ಪದತಲವ ಸ್ತುತಿಸು

ಆತಂಕ, ಆವೇಶ, ಉದ್ವೇಗದುದ್ಘೋಷಗಳು ಬೇಡ

ಅವು ನಿನ್ನ ಪ್ರಾಣದಾ ಆಯಾಮವಲ್ಲ

ಉಚ್ಛ್ವಾಸ ನಿಃಶ್ವಾಸಗಳ ಲಲಿತಕಲೆಯೊಂದ

ಬದುಕಿನಲಿ ನೀ ಕಲಿಯೆ ಆನಂದವೆಲ್ಲ

ಯೋಗವೇ ಮಾನವನ ಜೀವನದ ಸಾಧನವು

ಭೋಗವದು ರೋಗಗಳ ಮೂಲಕಾರಣವು

ರಾಗದ್ವೇಷದ ಕಿಡಿಗೆ ಬಲಿಯಾಗದೇ ಬದುಕಿ

ಆಗು ನೀನನುಭವದಿ ಆ ಬಾನ ಅರಿವು.

ಡಿ.ನಂಜುಂಡ

20/06/2015

ಕೊಳ್ಳುಬಾಕ

ಕೊಂಡವಸ್ತುಗಳೆಲ್ಲ ಸ್ಥಳಪೂರ್ತಿ ಆಕ್ರಮಿಸಿ

ನಿಲ್ಲಲೂ ನೆಲೆಯಿಲ್ಲ ಮನೆಗಳೊಳಗೆ

ಆದರೂ ನಿಲ್ಲದದು ಕೊಳ್ಳುವಿಕೆಯಾರ್ಭಟವು

ತೃಪ್ತಿಯೊಂದಿನಿತಿಲ್ಲ ಮನಗಳೊಳಗೆ

ಬಂದಿಹುದು ಇಂದಲ್ಲಿ ವಿಧವಿಧದ ವಸ್ತುಗಳು

ಮನದಣಿಯೆ ನೋಡೋಣ ಎಂದುಕೊಂಡು

ಅಂಗಡಿಗೆ ಹೋದೊಡನೆ ದೋಚಿದಂತೆಯೆ ಬಾಚಿ

ಮನೆಗೆ ತಂದಿಹ ನೋಡಿ ಕೊಂಡುಕೊಂಡು

ಕೊಳ್ಳುವಾಸೆಯು ನುಸುಳಿ ಮನದಗಲ ಕುಣಿದಾಡೆ

ಕೊಂಡು ತರುತಿಹ ದಿನವೂ ಒಂದೊಂದು ಸರಕ

ಒಂದರಾ ಮೇಲೊಂದು ಇಟ್ಟರೂ ಸಾಲದಿಹ

ಸರಕುಗಳೇ ತುಂಬಿರುವ ಮನೆಯೊಂದು ನರಕ

ಡಿ.ನಂಜುಂಡ

18/06/2015

ಶರಣಮಹಂ

ಶರಣಮಹಂ ಶರಣಮಹಂ ಸರ್ವಮಂಗಳಾಂಗನೇ

ಪಂಚಕರಣಪೂರ್ವಶರಣಮಹಂ ಸುಂದರಾನನೇ

ಸರ್ವರೂಪವರ್ಣಮಯಪ್ರಕೃತಿಕಾರ್ಯಕಾರಣಿ

ನಿತ್ಯಹರಿದ್ವರ್ಣವಿಪಿನಪುಷ್ಪಗಂಧಧಾರಿಣಿ

ಅನ್ನಸತ್ವಪೂರ್ಣಪೃಥ್ವಿಗರ್ಭಬಿಂದುಪಾಲಿನಿ

ನೀಲಮೇಘಭಾರವಾಹಪವನಚಿತ್ತಚಾಲಿನಿ

ಬಾಲಸೂರ್ಯಕಿರಣಪೂರ ಹಿಮಮಣಿಗಣಮಾಲಿನಿ

ಸುಂದರೇಂದುಹಾಸಬಂಧಪರ್ವತಾಗ್ರಚಾರಿಣಿ

ಕಾಕಕೋಕಿಲಾದಿ ನಿಖಿಲ ಖೇಚರಾತ್ಮರೂಪಿಣಿ

ಅಖಿಲವಿಶ್ವವ್ಯಾಪಿನಿ ಸಕಲದುಃಖನಾಶಿನಿ

ಜನನಮರಣಜರೇತ್ಯಾದಿ ಸರ್ವಭಯಾಪಹಾರಿಣಿ

ಡಿ.ನಂಜುಂಡ

17/06/2015