ಚಿಕ್ಕವರ ಎದೆಯೊಳಗೆ ಹೊಕ್ಕಿರುವ ಪದವೊಂದು
ಉಕ್ಕಿರುವ ನಗೆಯಲ್ಲಿ ಹಾಡಾಗಬೇಕು
ಅಕ್ಕರೆಯ ಮಾತುಗಳು ಮಾಧುರ್ಯದರಳಾಗಿ
ಪಕ್ಕವಾದ್ಯದ ಲಯಕೆ ಪುಟಿಯುತಿರಬೇಕು
ಹಕ್ಕಿಯುದರದಿ ಬೆಂದ ಹಣ್ಣಿನಾ ಬೀಜವದು
ಹಿಕ್ಕೆಯಲಿ ನೆಲಕುದುರಿ ಮರವಾಗಬೇಕು
ಅಕ್ಕಿಸಿಪ್ಪೆಯು ಬಿಟ್ಟ ಕಲಗಚ್ಚ ತಾ ಕುಡಿದು
ಚೊಕ್ಕ ಹಾಲನು ಹಸುವು ಸುರಿಸುತಿರಬೇಕು
ಒಕ್ಕಲಿಗ ತಾನುತ್ತು ಬೆಳೆದ ಧಾನ್ಯವನೊಕ್ಕಿ
ತಕ್ಕ ರೊಕ್ಕವ ಗಳಿಸಿ ಸುಖಿಯಾಗಬೇಕು
ಕೊಕ್ಕಿನಲಿ ಕಾಳುಗಳನಿಕ್ಕುತಲಿ ಮರಿಗಳಿಗೆ
ಮಿಕ್ಕುದನು ತಾನುಣುವ ಖಗವಾಗಬೇಕು
ಸಿಕ್ಕಸಿಕ್ಕೆಡೆಗಳಲಿ ಬೆಳಕ ಬಾಣವನೆಸುದು
ರಕ್ಕಸರನಟ್ಟಿಸುವ ರವಿಯಾಗಬೇಕು
ಉಕ್ಕುತಿಹ ಭಾವದಲಿ ಚಂದ್ರಬಿಂಬವು ಹೊಕ್ಕು
ಸೊಕ್ಕುತಲಿ ಹುಣ್ಣಿಮೆಯ ಸುಧೆಯಾಗಬೇಕು.
ಡಿ.ನಂಜುಂಡ
12/02/2014
