ಮನವೆ! ನೀ ಭ್ರಮಿಸದಿರು

ತನ್ನ ಕಾಲಿನ ಮೇಲೆ ನಿಲ್ಲಲಾರದ ಕಾಲ

ಓಡೋಡಿ ಮರೆಯಾಗಿ ಹೋಗುವುದು ಸುಳ್ಳು

ಮನವೆ! ನೀ ಬೆಂಬತ್ತಿ ಹೆಜ್ಜೆ ಗುರುತನು ಹುಡುಕೆ

ಇಲ್ಲದಿರುವುದು ಹೇಗೆ ಸಿಕ್ಕೀತು ಹೇಳು

ಭೂತಕ್ಕೆ ನೆಲೆಯಿಲ್ಲ ಭವ್ಯವೆಲ್ಲವು ಊಹೆ

ಇರುವುದೀ ಕ್ಷಣವೊಂದೆ-ಅನುಭವಿಸು ಮೊಗೆದು

ನಿನ್ನೆಯಾ ನೆನಪಿನಲಿ ನಾಳೆಯಾ ಚಿಂತೆಯಲಿ

ಮರೆಯದಿರು ಈ ಹೊತ್ತ –ಇನ್ನೆಂದು ಸಿಗದು

ಬುವಿಯ ಗುರುತರ ಕಾಂತವೆಲ್ಲವನು ಸೆಳೆದಂತೆ

ನಿನ್ನೂಹೆಗಳ ಸೆಳೆದು ಎಳೆದಾಡುತಿಹುದು

ಒಳಗಿನಿಂದಲಿ ಜಿಗಿದು ಹಾರುವಾ ಯತ್ನದಲಿ

ಇಲ್ಲದ್ದು ಇದ್ದಂತೆ ನಿನಗನಿಸುತಿಹುದು

ನಿನ್ನೆ-ನಾಳೆಗಳೆಲ್ಲ ಇರುವುದೀ ಕ್ಷಣದಲ್ಲಿ

ಬಿಟ್ಟರದು ಸಿಗದೆಂದೂ ಈ ಜನುಮದಲ್ಲಿ

ಬಂದ ಊಹೆಯು ನಿಂತು ಕೆಳಜಾರುವಾ ಮುನ್ನ

"ಇಂದು" ಇರುವುದು ನೋಡು ಆ ಬಿಂದುವಲ್ಲಿ

ಈ ಕ್ಷಣದ ಹೊತ್ತೊಂದು ಬಿಂದುಮಾತ್ರದಿ ಕಂಡು

ಅಲ್ಲಿ ವಿಸ್ತರಿಸೆ ಅದು ನಿರಪೇಕ್ಷದಂತೆ

ಆದ್ಯಂತರಹಿತದಲಿ ಏಕರಸವಾಗಿರದೆ

ನೀ ತಿಳಿದುದೆಲ್ಲವೂ ಸಾಪೇಕ್ಷದಂತೆ

ಮನವೆ! ನೀ ಭ್ರಮಿಸದಿರು, ನಿನ್ನೊಳಗೆ ನೆಲೆಯಾಗು

ಅನವರತವನುಭವಿಸು ಶಾಂತತೆಯ ಸೊಬಗ

ಈ ಕ್ಷಣದ ಅರಿವೊಂದು ಹರಿವಾಗಿ ವಿಸ್ತರಿಸಿ

ಜಗದಗಲ ಹರಡುತಿರೆ- ನೋಡಲ್ಲಿ ಬೆರಗ

ಡಿ.ನಂಜುಂಡ

27/04/2014