ಬಾ, ಹಣ್ಣ ಕೊಡುವೆ

ಎಲೆ ಬಾಲ! ನೀನಾರು? ನಿನ್ನಯಾ ಹೆಸರೇನು?

ಎಷ್ಟನೆಯ ತರಗತಿಯಲೋದುತಿರುವೆ?

ಈ ಹಾದಿಯೊಳು ಸಾಗಿ ಊರ ಶಾಲೆಗೆ ಹೋಗಿ

ಹಿಂತಿರುಗಿ ಬರುವಾಗ ಹಣ್ಣ ಕೊಡುವೆ

ನಾನು ನೆಟ್ಟಿಹ ಹಲಸು ಫಲವ ಕೊಟ್ಟಿದೆ ಇಂದು

ಹಿಸಿದು ಇಟ್ಟಿಹೆನದರ ಒಂದು ಭಾಗ

ಈ ಸಂಜೆ ನೀ ಬಂದು ತಿಂದು ಮುಂದಕೆ ಹೋಗು

ಬೀಜಗಳ ಬನದೆಡೆಗೆ ಎಸೆದು ಸಾಗು

ನಾ ಮರವ ಬೆಳೆಸಿಹೆನು; ನಾನದರ ಯಜಮಾನ

ಮರವಿತ್ತ ಫಲದಲ್ಲಿ ನಾನೆ ಇಹೆನು

ಈ ನಾನು ನಾನುಗಳ ಕೂಡಿಸಿಟ್ಟಿಹೆÀ ನೋಡು

ಕಳೆಯಬೇಕೆಲ್ಲವನು ಕೊನೆಗೆ ನಾನು

ನೀನು ಕೂಡುವ ಕ್ಷಣದಿ ನನ್ನದೆಲ್ಲವ ಕಳೆದು

ಮರದ ಬೇರೊಳು ಸರಿದು ಚಿಗುರನೇರಿ;

ನೀ ಗುಣಿಪ ಮರಮರದಿ ನಾನುಗಳ ಭಾಗಿಸುವೆ

ಸೊನ್ನೆಯಾಗುವ ತನಕ; ಹಲವು ಬಾರಿ.

ಡಿ.ನಂಜುಂಡ

18/07/2015