ಮಂಗಳವಾರ, ಮಾರ್ಚ್ 8, 2016

ಪಂಚಮಾತ್ರೆ

ನಿನ್ನೆ ದಿನ ಶಿವರಾತ್ರಿ ಮನೆಮಂದಿಯುಪವಾಸ
ಜಾಗರಣೆಯಿಂದಾಗಿ ಪುರುಸೊತ್ತು ಇಲ್ಲ
ಅನ್ನ ತಪ್ಪಲೆಯಿಲ್ಲ ತಿಳಿಸಾರುಕ್ಕಲಿಲ್ಲ
ಎಷ್ಟೊಂದು ಪಾತ್ರೆಗಳು ಏಕೆ ತೊಳೆದಿಲ್ಲ?

ತುಪ್ಪದಲಿ ಹುರಿದಂಥ ಘಮದ ಗೋಡಂಬಿಗಳು
ತುತ್ತೊಂದರಲ್ಲಿ ಹತ್ತತ್ತರಂತೆಣಿಸೆ
ತಿಂದ ಕೇಸರಿಬಾತು ಜಿಡ್ಡ ಜಿನುಗಿಸುತಿರಲು
ಗಂಟಲಲಿ ತಳವೂರಿ ತೇಗ ಗುಣಿಸೆ

ಹೊಟ್ಟೆಯಲ್ಲಡರಿದ್ದ ಗೊಜ್ಜೂಡಿದವಲಕ್ಕಿ
ಮೇಲಮೇಲಕೆ ಸಾಗಿ ಗಂಟಲನು ಒತ್ತಿ
ಹೆಸರುಪಾಯಸಗೂಡಿ ಹುದುಗಿದ್ದ ಜಿಡ್ಡನ್ನು
ಕಿತ್ತೊಗೆದು ಹೊರಹಾಕಿ ತಲೆಯ ಸುತ್ತಿ

ಕೆಳಗಿಳಿವ ಕ್ಷಣದಲ್ಲಿ ಮತ್ತೆ ಬೀಸಿತು ಗಾಳಿ
ಹೊಟ್ಟೆಯೊಳು ಹತ್ತಾರು ಸುತ್ತು ಹಾಕಿ
ಅರೆಯರೆದು ಅಳಿದುಳಿದ ಚರ್ಪುಗಳ ಜೊತೆಗೂಡಿ
ಬಾಯಿಂದ ಹೊರಹಾಕೆ ಉಳಿದಿಲ್ಲ ಬಾಕಿ


ಇಂತಿರಲು ತೊಳೆದದ್ದು ಹೊಟ್ಟೆಯೊಳಗಿನÀ ಪಾತ್ರೆ
ಹಾಗಾಗಿ ಬಚ್ಚಲಲಿ ಪಾತ್ರೆಗಳ ಜಾತ್ರೆ
ಶಿವರಾತ್ರಿಯುಪವಾಸ ಚರ್ಪುಗಳ ಸಹವಾಸ
ಈಗ ತಪ್ಪದೆ ತಿನ್ನಿ ಪಂಚಮಾತ್ರೆ

ಡಿ.ನಂಜುಂಡ
08/03/2016


ಸೋಮವಾರ, ಮಾರ್ಚ್ 7, 2016

ಉಪವಾಸ

ಗೊಜ್ಜೂಡಿದವಲಕ್ಕಿ ಜೊತೆಗೂಡಿದುಪ್ಪಿಟ್ಟು
ಮೇಲಾರು ರವೆಯುಂಡೆಗಳನು ಮುಕ್ಕಿ
ಹೆಸರುಬೇಳೆಯ ಪಾಯಸಾಕಂಠಪರ್ಯಂತ
ಕುಡಿದು ನಾಲಿಗೆಯಲ್ಲಿ ತಟ್ಟೆ ನೆಕ್ಕಿ

ಅನ್ನವನು ತಿನ್ನೆನಾನಿಂದೆನೆಗೆ ಶಿವರಾತ್ರಿ
ಯೆಂದನ್ಯ ಚರ್ಪುಗಳ ಮೇಲ್ಮೇಲೆ ಮೆಂದು
ಮೊಗದ ಹೊತ್ತಿಗೆ ತುಂಬ ಶಿವನ ಪಟಗಳ ತೂರಿ
ಕೃತಾರ್ಥರಾಗೋಣ ಬನ್ನಿ ನೀವಿಂದು

ತಿಳಿಹಾಸ್ಯದಾ ಹೊನಲ ತಲೆಮೇಲೆ ತಾ ಹೊತ್ತು
ಕುತ್ತಿಗೆಯ ಮುಂದಕ್ಕೆ ಚಾಚಿ ಕುಳಿತಿಹನು
ಗಣಪತಿಯ ಪ್ರತಿರೂಪ ಗಣಕಯಂತ್ರದ ಮುಂದೆ
ಮೂಷಕವನಾಡಿಸುತ ನಕ್ಕು ನಲಿಯುವನು

ಇಂತಿರಲು ಶಿವಲೀಲೆ ಶಿವರಾತ್ರಿಯಾಚರಿಸಿ
ಅಪರಾತ್ರಿಯಂಚಿನಲಿ ಮಲಗಿ ಧ್ಯಾನಿಸಿರಿ
ಮರುದಿನದ ಮಧ್ಯಾಹ್ನದನ್ನ ಬೇಯುವ ಸದ್ದು
ಕೇಳಿದೊಡನೆಚ್ಚೆತ್ತು ಊಟಗೈಯುವಿರಿ
ಎಲ್ಲವೂ ಶಿವಮಯವು ಎಂದು ತಿಳಿಯುವಿರಿ

ಡಿ.ನಂಜುಂಡ
07/03/2016