ಶನಿವಾರ, ಮೇ 6, 2017

ಹುಡುಕಾಟ

ಚುಕ್ಕಿಸಾಲಿನೊಲು ಬರುತಿದೆ
ಅಕ್ಕರಗಳ ಸಾಲು
ಇಕ್ಕುತಿಹುದು ಚಿತ್ತಾರಗಳ-
ನುಕ್ಕುತಿರುವ ಒಡಲು

ಹುಡುಗಾಟದ ಹುಡುಕಾಟದಿ
ಹಿಡಿದಾಡಿದ ನಡೆಯ
ಉಡುಗದಿರದ ನೆನಪುಗಳನು
ಕಡೆದು ಬಂದ ನುಡಿಯ
ಸಡಗರದಲಿ ತಡೆದು ತಡೆದು
ತಡಕಾಡಿರೆ ಹೃದಯ

ಗೋಲಿಯಾಡಿ ಕಳೆದು ಗೆದ್ದ
ಬಾಲ್ಯವನ್ನು ನೆನೆಯೆ
ಬೇಲಿ ಹಾರಿ ಸೀಬೆ ಕದ್ದ
ಕಾಲಗತಿಯನಳೆಯೆ
ಬಾಳಗಾಲಿಯರೆಗಳೆಲ್ಲ
ಮೇಲೇರುತಲಿಳಿಯೆ

ನೂರು ಗುನ್ನಗಳನು ತಿಂದು
ಹಾರಿ ಕುಣಿಯದಿರುವುದು
ಚೂರಾದರೂ ಬುಗುರಿಯಾರು
ಚೂರೂ ನೋಯದಿರುವುದು
ಆರರಿಗಳು ಕಾಡದಂತೆ
ಯಾರೊ ಕಾಯ್ದಿರುವುದು

ಉಡುಗದಿರದ ನೆನಪುಗಳನು
ಕಡೆದು ಬಂದ ನುಡಿಯ
ಸಡಗರದಲಿ ತಡೆದು ತಡೆದು
ತಡಕಾಡಿರೆ ಹೃದಯ

ಡಿ.ನಂಜುಂಡ
06/05/2017



ತೇರನೆಳೆವ ಬಾರೊ ತಮ್ಮ

ತೇರನೆಳೆವ ಬಾರೊ ತಮ್ಮ
ತೇರನೆಳೆಯೆ ಬಾರೊ
ತೇರಮಿಣಿಯ ಪಿಡಿದು ಮನವ
ನೇರವಿರಿಸ ಬಾರೊ
ತೇರನೆಳೆವ ಬಾರೊ ತಮ್ಮ
ತೇರನೆಳೆಯೆ ಬಾರೊ
ಊರ ಕಾಯ್ವ ಎಲ್ಲರಮ್ಮ
ಕೇರಿಗಿಳಿದು ನಲಿಯುವಾಗ
ಸೂರುಸೂರಿನೋರೆಗಳಲಿ
ತೂರುತಿರಲು ಕರುಣರಾಗ
ತೇರನೆಳೆವ ಬಾರೊ ತಮ್ಮ
ತೇರನೆಳೆಯೆ ಬಾರೊ
ಅಡಿಕೆ, ಅಕ್ಕಿ, ತೆಂಗನೈದು
ಮಡಿಲ ತುಂಬು ಬಾ
ಒಡಲ ತಣಿಪ ಅನ್ನವುಣಲು
ಸಡಗರದಲಿ ಬಾ
ತೇರನೆಳೆವ ಬಾರೊ ತಮ್ಮ
ತೇರನೆಳೆಯೆ ಬಾರೊ
ಮರಗಿಡಗಳ ಹಸಿರುಗಳಲಿ
ವರವೀಯುತಲಿರಲು
ಹರಿವ ನದಿಯಲವಳ ಮೊಗವು
ನೊರೆಯೊಲು ಬಿರಿದಿರಲು
ತೇರನೆಳೆವ ಬಾರೊ ತಮ್ಮ
ತೇರನೆಳೆಯ ಬಾರೊ
ಊರ ಮಣ್ಣಲಾಡ ಬಾರೊ
ತೇರನೆಳೆದು ಹಾಡ ಬಾರೊ
ತೇರನೆಳೆವ ಬಾರೊ ತಮ್ಮ
ತೇರನೆಳೆಯ ಬಾರೊ
ಡಿ.ನಂಜುಂಡ
05/04/2017