ಶುಕ್ರವಾರ, ಫೆಬ್ರವರಿ 28, 2014

ಅಭ್ಯಾಸ ಪದ್ಯ-1

ಆವಾಹಯಾಮಿ ಮಮ ಹೃತ್ಸುಮ ನಾಲಮಧ್ಯೇ
ದೇವಂ ವಸಂತಮಮರಂ ರತಿಸನ್ನಿವಿಷ್ಟಮ್ |
ತಾರುಣ್ಯಸುಂದರಮನೋಹರಮೋಹನಾಂಗಮ್
ಭವ್ಯಂ ಭವಂ ಸುಮಶರಂ ಮಧುಪೂರಣಾರ್ಥಮ್ ||

||ವಸಂತತಿಲಕಾವೃತ್ತ||
ಡಿ.ನಂಜುಂಡ

28/02/2014

ಮಂಗಳವಾರ, ಫೆಬ್ರವರಿ 25, 2014

ಒಲವ ರೂಪಚಂದ್ರಿಕೆ



ಇಳಿದು ಬರಲಂಗಳಕೆ
ಒಲವ ರೂಪಚಂದ್ರಿಕೆ
ಮಳೆಯಂತೆ ಎದೆಮಣ್ಣೊಳಿಂಗುತಿರಲಿ
ನಲಿವಾಗಿ ಮೊಳೆತೆದ್ದು ಚಿಗುರುತಿರಲಿ

ಬಾಳ ಬಾನನು ಬೆಳಗಿ
ಬೆಳಕನೀಯುತ ಬೀಗಿ
ನಲ್ಲೆಯಾ ಕಣ್ಣಂಚು ಮಿಂಚುತಿರಲಿ
ಗೆಲುವಿನಲಿ ಹೊಂಬಣ್ಣವುಕ್ಕುತಿರಲಿ

ಮಲ್ಲಿಗೆಯ ಲತೆಯೊಂದು
ಬಳುಕುತಲಿ ತಾ ನಿಂದು
ಬೆಳ್ಳಿಯಂದವ ಹೊತ್ತು ನಿಲ್ಲುವಂತೆ
ಎಲ್ಲೆಲ್ಲು ಪರಿಮಳವ ಚೆಲ್ಲುವಂತೆ

ಸೊಲ್ಲು ಸೊಲ್ಲಲಿ ಬಾಗಿ
ಕಲ್ಲೆದೆಯ ಒಳ ತಾಕಿ
ಪಲ್ಲವಿಸಿ ಮೈದುಂಬಿ ನಳನಳಿಸಲಿ
ಸೆಳವಿತ್ತು ಮನತುಂಬ ಹಬ್ಬುತಿರಲಿ

ಕಾಲಗಳ ಅರಿವಿರದೆ
ಸೋಲುಗಳ ಸುಳಿವಿರದೆ
ಒಲವ ಬಲವದು ತುಂಬಿ ತುಳುಕುತಿರಲಿ
ಬಾಳಿನಂಗಳದಲ್ಲಿ ಹರಡುತಿರಲಿ

ಡಿ.ನಂಜುಂಡ
25/02/2014

ಶನಿವಾರ, ಫೆಬ್ರವರಿ 15, 2014

ನಲ್ಲೆಯೊಲವು




ನಲ್ಲೆಯೊಲವಿನ ಜಲಧಿಯಲೆಯಲಿ
ಮೆಲ್ಲಮೆಲ್ಲನೆ ತೇಲುತ
ಚೆಲ್ಲಿತೆನ್ನೆದೆಯೊಳಗ ಭಾವವು
ಗಲ್ಲಕೋಕುಳಿಯೆರಚುತ

ನಲಿವ ನೊರೆಗಳ ಮೇಲಕೇರಿಸಿ
ಬಿಳಿಯ ನಗುವನು ಬಿಂಬಿಸೆ
ಬಾಳ ಬಾನಲಿ ಕೆಳಕೆ ಬಾಗಿಸಿ
ಏಳು ಬಣ್ಣಗಳೇಳಿಸೆ

ಸೋಲಿನಲೆಯಲಿ ಛಲವ ತುಂಬಿಸಿ
ಗೆಲುವ ಮೆಟ್ಟಿಲಿಗೇರಿಸೆ
ಕಲ್ಲ ಹೃದಯದಿ ಸೊಲ್ಲನಿಂಗಿಸಿ
ಚೆಲುವಿನೊರತೆಯ ಚಿಮ್ಮಿಸೆ

ಎಲ್ಲೆಯಿಲ್ಲದ ನಲ್ಲೆಯೊಲವಿಗೆ
ಸಲ್ಲಲೆನ್ನಯ ಸರ್ವವು
ಕಳೆದೆನೆಂಬುದು ಕಳಚಿ ಹೋಗಲಿ
ನಿಲ್ಲಲೆದೆಯಲಿ ಶೂನ್ಯವು

ಡಿ.ನಂಜುಂಡ
16/02/2014



ಶುಕ್ರವಾರ, ಫೆಬ್ರವರಿ 14, 2014

ಛಂದೋಮಯವೀ ಸೃಷ್ಟಿನಿಬಂಧವು



ಛಂದೋಮಯವೀ ಸೃಷ್ಟಿನಿಬಂಧವು
ಅತಿಶಯ ಸುಂದರನಂದನವು
ಸಂಧ್ಯಾರಾಗವು ಮಂದಸಮೀರವು
ಸರ್ವವು ಕಾವ್ಯಾಮೃತಹಿತವು

ಚೈತ್ರೋದ್ಯಾನದ ವನಕವಿಗೋಷ್ಠಿಯ
ಕೋಕಿಲಕಲರವ ಗಾಯನವು
ಶ್ರಾವಣವೃಷ್ಟಿಯ ತಟತಟ ತಾಳಕೆ
ನವಿಲ ಮನೋಹರ ನರ್ತನವು

ಕಾಯಕಯೋಗೀ ಕಾಕಾರವದಲಿ
ಆವರ್ತಿತ ಗುಣಿತಾಕ್ಷರವು
ಶ್ವಾನಾನನದಾ ಬೌಬೌಕಾರದಿ
ನಿಯಮಿತ ಗತಿಪದಸಂಪದವು

ಮರ್ಕಟಕಂಪಿತ ನಾನಾಶಾಖಾ
ಫಲಗಳ ಪತನದ ರಪರಪವು
ವನಚರಚಾಲಿತ ತರುತಲಹಾಸಲಿ
ಶ್ರುತಿಹಿತ ಪರಪರ ಸಹಜತೆಯು

ಪ್ರಕೃತಿವಿಘೋಷಿತ ನಾನಾವೃತ್ತದಿ
ವಿಧವಿಧ ಸ್ವರಗಳ ಪ್ರಜನನವು
ಏಕಾಕ್ಷರದಾ ನಾದತರಂಗವು
ಕವಿಮುಖವೈಖರಿವಲ್ಲರಿಯು

ಡಿ.ನಂಜುಂಡ
14/02/2014