ಮನ್ ಕೀ ಬಾತು

ತಪ್ಪು ಭಾವಿಸಬೇಡಿ ಜೊತೆಗೆ ಬಂದಿಹೆನೆಂದು

ಎಲ್ಲರೂ ಒಪ್ಪಿ ಆಗಿಹೆನು ಸಂಗಾತಿ

ಕೇಸರೀಬಾತೆಂಬ ಹುಟ್ಟು ಹೆಸರಿದೆಯೆನಗೆ

ಉಪ್ಪಿಟ್ಟ ಹೃದಯವನು ಪ್ರೀತಿಸಿದ ಗೆಳತಿ

ರವೆಯುಂಡೆಯಕ್ಕನೊಡೆ ಬಂದವರು ಗೊತ್ತಿದೆಯೆ?

ರವೆಯಿಡ್ಲಿಯೆನ ಬಾವ; ಒಳ್ಳೆ ಗುಣದವರು

ರವೆಯ ಮನೆತಕೆಲ್ಲ ಪರಿಮಳವ ತಂದಿತ್ತ

ಮಾವೊಳ್ಳಿ ಮಯ್ಯರೂ ನಮ್ಮ ಹರಸಿಹರು

ಕೇಸರಿಯ ಬಣ್ಣದುಡೆಯುಟ್ಟಿರುವ ನನ ಕಂಡು 

ಕೇಸರಿಯ ಪಡೆಯನ್ನು ಕಟ್ಟುತಿಹರು

ಉಪವಾಸ ನೇಮವಿರೆ ತಪವ ಮಾಡುವ ಜನರೂ

ಜಪಮಧ್ಯ ನಮ್ಮನ್ನೆ ನೆನೆಯುತಿಹರು

ಯಾವುದೇ ಸಭೆಯಿರಲಿ ನಡುವೆ ಹೊರನಡೆಯದೆಯೆ

ಕೊನೆವರೆಗೆ ಮರೆಯದೆಯೆ ಕುಳಿತಿರುವೆವು

ಗಲಭೆ ಗದ್ದಲ ಗೌಜಿನಿಂದಾದ ಒತ್ತಡವ

ಕ್ಷಣದೊಳಗೆ ತಣಿಸಲಿಕೆ ಕಾದಿರುವೆವು

ಎಲ್ಲರಿಗು ಬೇಕಾಗಿ ಬಾಳುತಿಹೆವು

ಡಿ.ನಂಜುಂಡ

15/01/2017