ಸೋಮವಾರ, ಫೆಬ್ರವರಿ 13, 2017

ಮಾರೀ ಹಬ್ಬ

ಬಂದಿದೆ ಬಂದಿದೆ ಮಾರೀ ಹಬ್ಬ
ಜನಜಂಗುಳಿಯೋ ಅಬ್ಬಬ್ಬ!
ಜಗವನೆ ಜನತೆಗೆ ಮಾರಲು ಬಂದಿವೆ
ವಿಧವಿಧದಂಗಡಿಗಳ ದಿಬ್ಬ

ರಸ್ತೆಗಳಿಕ್ಕೆಲಗಳನೂ ಮುತ್ತಿವೆ
ಸುತ್ತಿವೆ ಚಕ್ರವ್ಯೂಹದೊಲು
ಒಳಗಡಿಯಿಟ್ಟರೆ ಹೊರಬರದಂತೆ
ತಡೆಗಟ್ಟುತಲಿವೆ ವಸ್ತುಗಳು

ಕೊಳ್ಳಿರಿ, ಬನ್ನಿರಿ ಎಂದರೆ ಸುಬ್ಬ
ಮಾತಿನಲೆಳೆವನು ಇದಿನಬ್ಬ
ಮನವಿಬ್ಬಗೆಯಲಿ ಮುಂದಡಿಯಿಟ್ಟರೆ
ಹಿಂದಕೆ ನೂಕುವನಿನ್ನೊಬ್ಬ

ಕೊಳ್ಳಲು ನುಗ್ಗುವ ಮಂದಿಗಳಾರು
ತಳ್ಳುತ ಹಿಗ್ಗಿ ನಲಿವರು ನೂರು
ಅತ್ತಿತ್ತಗಲದೆ ಸುಮ್ಮನೆ ನಿಂತರೂ
ಕಡೆಗೀಕಡೆಗೊತ್ತುವರು

ಸಾಗರಮಥನದ ಕಡಗೋಲಾದ
ವಾಸುಕಿಯೇ ಮೈದಳೆದಂತೆ
ಕಾಣುತಲಿಹುದು ಸರತಿಯ ಸಾಲು
ದೇವರ ದರುಶನಕಂತೆ

ಸಾಗರದುಬ್ಬರದಲೆಗಳ ಅಬ್ಬರ
ತಾನೇ ಇಲ್ಲಿಗೆ ಬಂದಿದೆಯೋ?
ಇಲ್ಲಿಯ ಗದ್ದಲಕೆದ್ದಿಹ ದೇವರ
ಗದ್ದುಗೆಯೇ ಅಲ್ಲಲುಗಿದೆಯೋ?

ಡಿ.ನಂಜುಂಡ

14/02/2017

ಕಾಮೆಂಟ್‌ಗಳಿಲ್ಲ:

ಕಾಮೆಂಟ್‌‌ ಪೋಸ್ಟ್‌ ಮಾಡಿ