ಪಕ್ಷಪಾತ!?

ವಿದ್ಯುದವಲಂಬನೆಗೆ ಮಾನವನು ನಲುಗೆ

ವಿದ್ಯುದಾಲಿಂಗನದಿ ಸತ್ತಂತೆ ಕಾಗೆ

ಕಾಗೆ ಸತ್ತರೆ ಜಗಕೆ ಇನಿತಿಲ್ಲ ಕೊರತೆ

ಮನುಜ ಸತ್ತರೆ ಏಕೋ ಕಣ್ಣೀರಿನೊರತೆ

ಕಾಗೆಗಳ ಸಂಕುಲಕೆ ಶಾಂತಿಯನು ನೀಡಿ

ನರಜನ್ಮವನು ಮಾತ್ರ ಕತ್ತಲೆಗೆ ದೂಡಿ

ಪಕ್ಷಪಾತವನೆಣಿಪ ಆ ದೇವನಾರು?

ಎಲ್ಲಿಹುದು ಈ ಜಗದ ಮಲತಾಯಿಬೇರು?

ಕತ್ತಲೆಯು ಕವಿದಾಗ ಸೊಡರಿನೊಳು ಬಂದು

ಹೇಳುತಿಹನೀ ಬೆಳಕು ನಿನಗೆ ಸಾಕೆಂದು

ಮಾನವನ ನೈವೇದ್ಯದನ್ನವನು ತಿಂದು

ಆ ದೇವ ಹೀಗೇಕೆ ಮಾಡುತಿಹನಿಂದು

ಮನುಜಗಿಲ್ಲದ ಸುಖವು ಕಾಗೆಗಳಿಗೇಕೆ?

ಆ ರವಿಯ ಬೆಳಕೊಂದೇ ಮಾನವಗೆ ಸಾಕೆ?

ಡಿ.ನಂಜುಂಡ

02/09/2015