ಮಂಗಳವಾರ, ಸೆಪ್ಟೆಂಬರ್ 29, 2015

ರಾವಣನ ನೆನೆ ನರನೆ!

ಅನುದಿನವು ನೂರು ಸಲ ರಾವಣನ ನೆನೆ ನರನೆ!
ಬಂದಾನು ಶ್ರೀರಾಮ ನಿನ್ನ ಬಳಿಗೆ
ದುಷ್ಟಮನವದೇ ಲಂಕೆ ಎಂದವನು ತಿಳಿದಾನು
ಅದ ಸುಡಲು ಸಾಕವಗೆ ಅರ್ಧ ಘಳಿಗೆ

ನೂರಾರು ಸ್ತ್ರೀಯರನು ಚಿತ್ತದೊಳು ಛಾಪಿಸುತ
ಹೊತ್ತೊಯ್ದು ಬಚ್ಚಿಟ್ಟ ಪಾಪಿಷ್ಠ ನೀನು
ಭಾವಬಿಂಬದೊಳಿಟ್ಟು ಮೋಹಿಸಿದ ಮಾಯಾವಿ
ಹತ್ತು ತಲೆ ರಾವಣನ ತದ್ರೂಪಿ ನೀನು

ರಾವಣನ ನೆನೆನೆನೆದು ರಾವಣನೆ ನೀನಾಗು
ಸಾಕ್ಷಿಯಲಿ ಶ್ರೀರಾಮನೆಚ್ಚೆತ್ತು ಬರಲಿ
ರಾಮನೊಡ ಕಾದಾಡೆ ರಾವಣಾಂಶವು ಮಡಿದು
ಕಾಮಾದಿ ರಾಕ್ಷಸರ ಹುಟ್ಟಡಗುತಿರಲಿ

ಡಿ.ನಂಜುಂಡ
29/09/2015


ಕಾಮೆಂಟ್‌ಗಳಿಲ್ಲ:

ಕಾಮೆಂಟ್‌‌ ಪೋಸ್ಟ್‌ ಮಾಡಿ