ಅರ್ಥದೊಳಗೊಂದಾಗು

ಬಣ್ಣ ಬಣ್ಣದ ಭಾವಮೃಗವ ಬೆಂಬತ್ತದಿರು
ಬಂಗಾರದೊಲು ಹೊಳೆವ ಹಾಗಿದ್ದರೂ
ಅರ್ಥರಾಮನ ಬಿಟ್ಟು ಅನ್ಯಗತಿ ನಿನಗಿಲ್ಲ
ಮಾತೆ! ನಿನ ಗಮನ ಸೆಳೆವಂತಿದ್ದರೂ

ಕಲ್ಪನೆಯ ಚಿತ್ರದೊಳು ಮಾರೀಚನವತರಿಸಿ
ನಿನ್ನ ನೋಟವ ತನ್ನ ಮೈಮಾಟಕಿಳಿಸಿ
ಅತ್ತಿತ್ತಲೋಡಾಡಿ ಹೊತ್ತೊಯ್ದು ಹತ್ತರ್ಥ-
ದಡಿಹಾವ ಹುತ್ತದೊಳು ನಿನ್ನನಿಳಿಸಿ

ಅಳಿಸಿ ನೋವುಣಿಸುವಾ ಮುನ್ನವೊಳನೋಟದೊಳು
ಬಾಗಿ ಹಾಡಾಗಿ ಹರಿಯುತ್ತ ಸಾಗಿ
ಒಂದರ್ಥದೊಳಗೆ ನೀನೊಂದಾಗಿ ಹರಹಾಗು
ಹಲವಾಗಿ ತೋರುವಂತರ್ಥವಾಗಿ

ಡಿ.ನಂಜುಂಡ
14/01/2018