ನಾಳೆಗೇನು ತಿಂಡಿ?

ಹೇಳು ನಲ್ಲ! ನಾಳೆ ತಿನ್ನ-

ಲೇನು ತಿಂಡಿ ಮಾಡುವೆ?

ತವರಿನಲ್ಲಿ ಕುಳಿತ ನನಗೆ

ನೀನು ನೆನಪಾಗುವೆ

ಒಂದು ಲೋಟ ಕೆಂಪಕ್ಕಿಯನು

ಮೆಂತ್ಯದೊಡನೆ ನೆನೆಸಲೇ?

ಹಾಸಿಗೆಯಿಂದೆದ್ದು ರುಬ್ಬಿ

ದೋಸೆಯೆರೆದು ತಿನ್ನಲೇ?

ಏಳುವಾಗ ಕರೆಂಟಿಲ್ಲ-

ದಿದ್ದರೇನು ಮಾಡಲೇ?

ತಂಗಳನ್ನ ಕೂಡಿಸಿಟ್ಟು

ಚಿತ್ರಾನ್ನವನೂಡಲೇ?

ಇಲ್ಲ, ಇಲ್ಲ, ಸಾಧ್ಯವಿಲ್ಲ

ಹಸಿಮೆಣಸುಗಳಿಲ್ಲದೆ

ಫೋನಿನಲ್ಲಿ ನೀನೊಮ್ಮೆ…

ನೆನಪು ಮಾಡಬಾರದೆ?

ಅಷ್ಟಮಿಯಲಿ ತಂದಿಟ್ಟ

ಅವಲಕ್ಕಿಯ ತಿನ್ನಲೇ?

ಮುಗ್ಗಿದುದಕೆ ಮೊಸರನೆರೆದು

ಹೇಗೆ ತಿಂದು ಮುಕ್ಕಲೇ?

ಹೋಟೆಲ್ಲಿನ ತಿಂಡಿ ತಿಂದು

ಕಾಯಕವನು ಮುಗಿಸಲೇ?

ಉದರವಾಯುವುಬ್ಬರಿಸೆ

ತೇಗಿ ತೇಗಿ ತಗ್ಗಲೇ?

ಬೇಡ ಬೇಡ ‘ಕಾಡ ಬೇಡ’

ನಂಜುಂಡನ ನೆನೆಯುವೆ

ಮತ್ತೆ ಮತ್ತೆ ಗಂಜಿಯುಂಡು

ಇಹವನ್ನೇ ಮರೆಯುವೆ.

ಡಿ.ನಂಜುಂಡ

24/10/2015