ಭಾವಧಾರೆ

ಸರ್ವಾರ್ಥಸಂಸಾರದಾಪಗದ ಹರಿವಿನಲಿ

ಸ್ವಾರ್ಥಗಳ ಕಳೆಗಳನು ದಡಗಳಿಗೆ ತಳ್ಳಿ  

ಸಾಗರವ ಸೇರಿ ತಾ ಹೆಸರನಳಿಸುವ ಭರದಿ

ಭೋರ್ಗರೆಯಲೆದೆಮಣ್ಣ ಹರಡುವುದು ನಳ್ಳಿ   

ಅಲ್ಲೊಮ್ಮೆ ಬಾಗುತಿರೆ ಮಳೆಬಿಲ್ಲ ಬಣ್ಣಗಳು

ಭಾವಗಳು ಬೆಡಗಿನಲಿ ಬಳುಕುವುದ ನೋಡಿ 

ಸೃಷ್ಟಿಯೇ ತಾನೆದ್ದು ತಾನನದಿ ಮೇಳೈಸಿ

ತಾಳಗಳ ಹಾಕುವುದು ತಂತಾನೆ ಹಾಡಿ

ಅರ್ಥಗಳನರೆದಿಲ್ಲ ಸ್ವಾರ್ಥಗಳ ಬೆಸೆದಿಲ್ಲ

ಆದರೂ ಪದಗಳಲಿ ಎಂಥದೋ ಕುಣಿತ

ಮುಂಬೆಳಗ ಸಂಭ್ರಮದಿ ಹಕ್ಕಿಗಳು ಹಾಡುವೊಲು

ಎದೆಬಾನನಾವರಿಸೆ ಸರಿಗಮವು  ಸತತ

ಭಾವಧಾರೆಯ ಹರಿವು ಸಾವುನೋವ್ಗಳ ಮೀರಿ

ಸಂತತವು ಹೆಸರಿರಿವ ಮರೆಯುತಿರಲಲ್ಲಿ

ಯಾವುದೋ ದಿವ್ಯತೆಯ ಸೌಂದರ್ಯವವತರಿಸಿ

ಜಗದಗಲ ನಿಂತಂತೆ ಅರಿವಾಳದಲ್ಲಿ

ಡಿ.ನಂಜುಂಡ

08/04/2016