ಹಬ್ಬ

ನೀರ್ತುಂಬುವುದು ಹಬ್ಬ ಎಣ್ಣೆ ಸ್ನಾನವು ಹಬ್ಬ

ಗೋವುಗಳ ಪೂಜಿಸಲು ಇಹುದೊಂದು ಹಬ್ಬ

ಹೊಸ ಹರುಷದಲ್ಲಿ ಹೊಸತುಡೆಯನುಡುವುದು ಹಬ್ಬ

ಸಾಲು ಸಾಲಲಿ ಹಣತೆ ಹಚ್ಚುವುದು ಹಬ್ಬ

ಆಕಾಶ ಬುಟ್ಟಿಗಳ ಸೂರ ತುದಿಯಲಿ ಸಿಗಿಸಿ

ಕಣ್ ದಣಿಯೆ ನೋಡುವುದು ನಮಗೆ ಹಬ್ಬ

ಅಲ್ಲಲ್ಲಿ ಕೋಲ್ದೀಪಗಳ ಹಚ್ಚುವುದು ಹಬ್ಬ

ಹಾಡುವುದು ಕುಣಿಯುವುದು ಎಲ್ಲವೂ ಹಬ್ಬ

ಮೌನವಿರುವುದು ಹಬ್ಬ ಧ್ಯಾನಗೈವುದು ಹಬ್ಬ

ಬಾಯ್ತುಂಬ ಮಾತಾಡೆ ಹಬ್ಬವೋ ಹಬ್ಬ

ಎಲ್ಲ ಕಜ್ಜಗಳೆಮಗೆ ಕಜ್ಜಾಯದಂತಾಗೆ

ಕ್ಷಣ ಕ್ಷಣವು ಹೊಸೆಯುತಿದೆ ಹೊಸತೊಂದು ಹಬ್ಬ

ಡಿ.ನಂಜುಂಡ

28/10/2016

28/10/2016

ಭೂಮಾತೆ

ಗಂಧವತಿ ಭೂಮಾತೆ ಬಂಧಮೋಕ್ಷವಿದಾತೆ

ಒಂದು ಕೊಡೆ ಹಲವೀವ ಆನಂದಪಾತ್ರೆ

ಎಂದೆಂದಿಗೂ ಸೆರಗ ಹರಹಿನಲಿ ನೆರಳಿತ್ತು

ಕಂದರನು ಪೊರೆಯುತಿಹ ಅನ್ನದಾತೆ

ಹುಣ್ಣಿಮೆಯ ಹೊಂಗಿರಣವೂಡುತಿರೆ ಮಣ್ಣಿನಲಿ

ಕಣ್ಣೆವೆಯನರೆ ತೆರೆದು ಔಷಧವನರೆವೆ

ಬಣ್ಣಗಳಲೂಡಿಸುತ ಮರಬಳ್ಳಿಗಳಿಗೆಲ್ಲ

ತನ್ನೊಲವಿನೊಳಲೆಯೊಳು ತಂಪನೆರೆವೆ

ಹಸಿರ ಕುಡಿಯುಸಿರಿನಲಿ ಬಸಿರೊಡೆದ ಕಾಳ್ಗಳಲಿ

ಹೊಸತನÀದ ಕುಡಿಯೊಡೆದು ಕೆಂಪಗಾಗೆ

ನಸುನಗುವು ಟಿಸಿಲೊಡೆದು ತೊದಲುಲಿಯ ಮಧುವಾಗಿ

ಹಸುಗೂಸನಾಡಿಸುವ ಲಾಲಿಯಾಗೆ

ಬಾನಗಲ ಮೈದಳೆದ ನಾನು ನಾನೆಂಬುದದು

ಕಾನ ಮಣ್ಣೊಳಗಿಳಿದು ಲೀನವಾಗೆ

ತಾನನದ ದನಿಯೊಂದು ಮರು ಜನ್ಮದಳುವಾಗಿ

ತಾನುಳಿಯೆ ನೀ ಕಾಯೆ ತಾಯಿಯಾಗೆ

ಡಿ.ನಂಜುಂಡ

16/10/2016

ವಾಗರ್ಥಪಕ್ಷಿಗಳು

ವಾಗರ್ಥಶೃಂಗಾರಕೇಲಿಯಾ ಸಮಯದಲಿ

ಅರ್ಥವನು ಕೊಲೆಗೈದ ಪಾಪಿ ನೀನೋ?

ದೇಹದೊಳಗಿರುವಾತ್ಮ ನಿತ್ಯವಾಗಿರುವಂತೆ

ಅರ್ಥಕ್ಕೆ ಸಾವಿಲ್ಲ -ಅಲ್ಲವೇನೋ?

ತನುಮನವು ಮೈಮರೆತು ನಾಮರೂಪವ ಭಜಿಸೆ

ಅರಿವು ಗೋಚರಿಪುದೇ? ಅರಿತು ಹೇಳು

ದೇಹಭಾವವನಳಿಸಿ ಮನವ ಬಾನೊಳಗಿಳಿಸಿ

ಆತ್ಮಾರ್ಥಭಾವಗೀತೆಯೊಲು ಕೇಳು

ವಾಕ್ಸೀತೆಯಪಹರಿಸೆ ಅರ್ಥರಾಮನು ಬಿಡದೆ

ಹತ್ತು ತಲೆಗಳ ಕಡಿದು ಮತ್ತೆ ಪಡೆಯೆ

ಪ್ರಕೃತಿಪುರುಷರ ಹಾಗೆ ಕವಿಋಷಿಯ ಭಾವದೊಳು

ರಾಮಸೀತೆಯ ಹಾಗೆ ಜೀವದಳೆಯೆ

ವಾಗರ್ಥದಂತಿಹುದು ಕ್ರೌಂಚಮಿಥುನ

ವ್ಯಥೆಯೆ ಕತೆಯಾದಂತೆ -ರಾಮಾಯಣ

ಡಿ.ನಂಜುಂಡ

15/10/2016

ವಾಗರ್ಥಪಕ್ಷಿಗಳು

ವಾಗರ್ಥಶೃಂಗಾರಕೇಲಿಯಾ ಸಮಯದಲಿ

ಅರ್ಥವನು ಕೊಲೆಗೈದ ಪಾಪಿ ನೀನೋ?

ದೇಹದೊಳಗಿರುವಾತ್ಮ ನಿತ್ಯವಾಗಿರುವಂತೆ

ಅರ್ಥಕ್ಕೆ ಸಾವಿಲ್ಲ -ಅಲ್ಲವೇನೋ?

ತನುಮನವು ಮೈಮರೆತು ನಾಮರೂಪವ ಭಜಿಸೆ

ಅರಿವು ಗೋಚರಿಪುದೇ ಅರಿತು ಹೇಳು?

ದೇಹಭಾವವನಳಿಸಿ ಮನವ ಬಾನೊಳಗಿಳಿಸಿ

ಆತ್ಮಾರ್ಥಭಾವಗೀತೆಯೊಲು ಕೇಳು

ವಾಕ್ಸೀತೆಯಪಹರಿಸೆ ಅರ್ಥರಾಮನು ಬಿಡದೆ

ಹತ್ತು ತಲೆಗಳ ಕಡಿದು ಮತ್ತೆ ಪಡೆಯೆ

ಪ್ರಕೃತಿಪುರುಷರ ಹಾಗೆ ಕವಿಋಷಿಯ ಭಾವದೊಳು

ರಾಮಸೀತೆಯ ಹಾಗೆ ಜೀವದಳೆಯೆ

ವಾಗರ್ಥದಂತಿಹುದು ಕ್ರೌಂಚಮಿಥುನ

ವ್ಯಥೆಯೆ ಕತೆಯಾದಂತೆ -ರಾಮಾಯಣ

ಡಿ.ನಂಜುಂಡ

15/10/2016

ಬಾ ದುರ್ಗೇ

ದುಷ್ಟವಿನಾಶಿನಿ ದುರ್ಗತಿಹಾರಿಣಿ

ದುರ್ಜನಭಂಜಿನಿ ಹೇ ದುರ್ಗೇ

ದುರಿತವಿದೂರಿಣಿ ದುಃಖನಿವಾರಿಣಿ

ದುರ್ವೃತ್ತಶಮನಿ ನವದುರ್ಗೇ

ಅಂತಃಕರಣದೊಳಾವಿರ್ಭವಿಸಿ

ಅಷ್ಟದಲೋಪರಿ ನೀ ನೆಲೆಸಿ

ದುರಹಂಕಾರವ ದೂರೀಕರಿಸಲು

ಕಂಠವಿಶುದ್ಧದಿ ಹೂಂಕರಿಸಿ

ವ್ಯೋಮಾಂತರ್ಗತದೋಂಕಾರವನು

ನಾಭೀಮೂಲಕೆ ತಂದಿರಿಸಿ

ನಾದನಿನಾದವಿನೋದಾಮೋದವ

ಸುನಿಧಾನದೊಳಾಹತಗೊಳಿಸಿ

ಪ್ರಾಣದ ಕಣಕಣವನು ಸಂಕರ್ಷಿಸಿ

ಧ್ಯಾನಧ್ಯೇಯಕೆ ಧಾರಣೆಗೆ

ಮತಿಸಂಚಾರದ ಪಥದರ್ಶನಕೆ

ನಿತ್ಯಮಕ್ತತೆಯ ಅನುಭವಕೆ

ಬಾ ಮಮ ಜೀವನ ಸದ್ಗತಿಗೆ

ಡಿ.ನಂಜುಂಡ

01/10/2016

?

ಕೆಳಕುದುರಿ ಮಣ್ಣಿನೊಳು ಬೆರೆತ ಎಲೆಗೊಳಕುಗಳ
ಎಳೆದು ಮತ್ತದನೆ ಫಲವೀಯುವಾ ನಾವು
ಅಳಿದು ಪಳೆಯುಳಿಕೆಯೊಲು ನೆಲಕೆ ಸಾರವನಿತ್ತು
ಬೆಳೆಯ ಕಾಳ್ಗಳಿಗೇರಿ ಕೆಳಗೆ ಬಾಗುವೆವು

ಸಾವಯವ ಸಾರವಿರೆ ಗೋವ ವರದಾನವಿರೆ
ಭಾವರಂಜಕವೀವ ಬಾನು ದನಿಯನೆರೆ
ಯಾವುದೇ ಅನ್ಯರಸಗೊಬ್ಬರಗಳೇತಕ್ಕೆ
ನಾವು ಸಹಕಾರಗಳನೆಲ್ಲೆಡೆಯು ಬೀರೆ

ಎಲೆ ಮನುಜ ನೀನಾಸೆಗಡಿಯಾಳಿನಂತಾಗಿ
ಎಲೆಯ ನಿಜಬೆಲೆಯನೂ ತಿಳಿಯದಿಹೆಯೇಕೆ?
ಕಾಲದಾ ಸಹಜ ಗತಿಯಲ್ಲಿ ಮಾಗುವ ಮುನ್ನ
ಕೊಲೆಗಡುಕನೊಲು ಹಲವು ವಿಷ ಸುರಿವೆಯೇಕೆ?

ಕಾಮಾದಿ ಕೀಟಗಳು ಕೊರೆಯುತಿರಲೊಳಗೊಳಗೆ
ನೀ ಮೊದಲು ಅವುಗಳಿಗೆ ಬೆಂಕಿಯನು ಹಾಕು
ವ್ಯಾಮೋಹರೋಗಕ್ಕೆ ಅದರ ಬೂದಿಯೆ ಸಾಕು
ಭೂಮಾತೆಯೊಲಿಯಲಿಕೆ ಸಾಕುರಿವ ಬೆಳಕು

ಇಂತು ನಿಮ್ಮ ಮರಗಳು

30/09/2016
(ಮಿತ್ರರೊಬ್ಬರ ಕೋರಿಕೆಯ ಮೇರೆಗೆ ಬರೆದದ್ದು)