ಸಂಭ್ರಮಿಸು

ಬಿತ್ತರದ ಆಗಸದಿ ಕತ್ತಲೆಯ ತಾ ಕಳೆದು

ಬತ್ತದುತ್ಸಾಹದಲಿ ಸಂಚರಿಸೆ ರವಿಯು

ನಿತ್ಯ ಋತುಪರ್ವಗಳ ಉಲ್ಲಾಸರಸದಲ್ಲಿ

ಉತ್ತರಕೆ ಪದವಿರಿಸಿ ಹಾಡಿದನು ಕವಿಯು

ಎಳ್ಳು ಬೆಲ್ಲವ ತಿಂದು ಒಳ್ಳೆಯಾ ಮಾತಾಡು

ಬಲ್ಲವರ ಸೂಳ್ನುಡಿಗಳನು ಸಂಕಲಿಸು

ಹಲ್ಲುಗಳ ನಡುವಿರಿಸಿ ಕಬ್ಬ ಮೆಲ್ಲುತ ಸಾಗು

ಗೆಲ್ಲುಗಳ ಸಂಕ್ರಮಿಸಿ ಸಂಭ್ರಮಿಸಿ ಸುಖಿಸು

ಅಣುವಣುವು ಕ್ಷಣವೆಣಿಪ ತಾಳಕ್ಕೆ ಝಣಝಣಿಸೆ

ಮನಕೆ ಸಂತಸವೀವ ಭಾವವನು ಹರಿಸು

ಮೌನಘನಚೇತನದ ಕಣದಿ ನುಡಿಗಳನೊಕ್ಕಿ

ಅನವರತ ಕುಣಿಕುಣಿದು ಸುಗ್ಗಿಯಾಚರಿಸು

ಡಿ.ನಂಜುಂಡ

15/01/2015