ಕಾಫಿ

ಬಿಸಿಬಿಸಿ ಕಾಫಿಯ ಹಬೆಯನು ಸ್ಪರ್ಶಿಸೆ

ತಲೆಬಿಸಿಯಾ ಕಾವಳಿಯುವುದು

ಮೇಲಧಿಕಾರಿಯ ದರ್ಪದ ಬಿರುಮೊಗ

ಕ್ಷಣಮಾತ್ರದಿ ಮರೆಯಾಗುವುದು

ಒತ್ತಡಗಳು ಬದಿ ಸರಿಯುವುವು

ಬತ್ತಿದ ಕಂಗಳು ಅರಳುವುವು

ತಲೆಗೂದಲುಗಳು ಒಗ್ಗೂಡುವುವು

ಇಂದ್ರಿಯಗಳು ಸಭೆ ಸೇರುವುವು

ಸಿಹಿಗೂಡಿದ ಕಹಿ ಕಾಫಿಯ ಹೀರುತ

ಬುರುಬುರಿಗಳ ತಾ ಕಡಿಯುತಿರೆ

ಸರಸರ ಪದಗಳು ಸರತಿಯ ಸಾಲಲಿ

ನಾಲಗೆ ಮೇಲ್ ಕುಣಿಕುಣಿಯುತಿರೆ

ನಾಳೆಯ ಚಿಂತೆಗಳೆಲ್ಲವು ಕೂಡಲೆ

ನೇಣಿನ ಕುಣಿಕೆಗೆ ಬೀಳುವುವು

ಸುಮ್ಮನೆ ಮನಸನು ಸುಟ್ಟಾ ತಪ್ಪಿಗೆ

ಆತ್ಮಾರ್ಪಣೆಯಲಿ ಕೊನೆಯಾಗುವುವು

ಕಾರ್ಗತ್ತಲ ತೆರ ಕೆಳಗಿಳಿದಿಹ ಗಸಿ

ಲೋಟದ ಬುಡದಲಿ ಒಗ್ಗೂಡೆ

ಹರಿ ಕುಳಿತಿಹ ಹೃತ್ಪದ್ಮದ ದಳಗಳು

ಕಾಫಿಯ ಪರಿಮಳದೊಡಗೂಡೆ

ಇಂದಿನ ಕೆಲಸವ ಇಂದೇ ಮಾಡುವೆ

ಎಂಬಾ ಶಪಥವು ಚಿಮ್ಮುವುದು

ಹೆಂಡತಿ ಮಕ್ಕಳು ಮಿತ್ರರು ಮುದುಕರು

ಎಲ್ಲರ ಮೇಲ್ ದಯೆಮೂಡುವುದು

ದೂರದ ದೃಷ್ಟಿಯು ಹೊಳೆಯುವುದು

ಮಾರ್ಗವು ಗೋಚರವಾಗುವುದು

ತುಸು ಸುಲಭದ ಹೊಸ ಪಥದಲಿ ಚಲಿಸಲು

ನಿರ್ಮಲ ಮನಸಣಿಯಾಗುವುದು

ಶುಭಮಂಗಳಕರವಾಗುವುದು.

ಡಿ.ನಂಜುಂಡ

27/01/2015