ಒಲವು

ಮಳೆಯು ಇಳೆಗಿಳಿಯೆ ನೆಲದ ಒಲವುಕ್ಕಿ

ಕಾಳ್ ಸೀಳಿ ಮೊಳೆತು ಚಿಮ್ಮಿ ಚಿಗುರಿ

ಗೆಲ್ಲು ಗೆಲ್ಲುಗಳ ನಡುವೆ ಅಲ್ಲಲ್ಲಿ

ಬಸಿರೊಡೆಯೆ ನೂರು ಬಾರಿ

ದುಂಬಿ ಹಿಂಡುಗಳು ಜೇನ ತುಂತುಂಬಿ

ಕುಡಿದು ಕುಪ್ಪಳಿಸಿ ಹಾರಲಲ್ಲಿ

ಚೆಲುವು ಚಲಿಸಿದೊಲು ಒಲವು ಫಲಿಸಿದೊಲು

ಕೆಲವು ಹಲವಾಗಿ ನಲಿಯಲಲ್ಲಿ

ಮಂತ್ರಘೋಷಗಳು ತಾನೆ ಹೊಮ್ಮುವುವು

ಹಕ್ಕಿಗಳ ಕೊರಳ ತಂತುಗಳಲಿ

ಹೊನಲುಗಳು ನೆರೆದು ಬೀಗಿ ನಡೆಯುತಿರೆ

ತಳುಕು ಬಳುಕಿನಲಿ ತಗ್ಗುಗಳಲಿ

ಚೆಲುವು ಕಣ್ತುಂಬಿ ಎದೆ ಹೂವಿಗಿಳಿದು

ಅಕ್ಷರಕ್ಷರವ ಸೇರುತಿಹುದು

ನಲವು ತಾನುಬ್ಬಿ ಕಣಕಣಕೆ ಹಬ್ಬಿ

ಸುಗ್ಗಿ ಕುಣಿತದೊಲು ಕುಣಿಯುತಿಹುದು 

ಡಿ.ನಂಜುಂಡ

12/05/2016