ಹೊಸತನವು ಬಸಿರಾಗಲಿ!

ಹೊಸವರುಷವು ಹರುಷದೆದೆಯ

ಹೊಸಿಲಿನೊಳಗೆ ದಾಟಲಿ.

ಹೊಸತನವನು ಬಸಿರಾಗಿಸಿ

ಉಸಿರುಸಿರಲಿ ಚಲಿಸಲಿ.

ಮೈಮನಗಳು ನಲಿದಾಡುತ

ಸಮರಸದಲಿ ಕುಣಿಯಲಿ.

ಮಾಮರದಲಿ ಕೋಗಿಲೆಗಳ

ಹಿಮ್ಮೇಳವು ಮೊಳಗಲಿ.

ತೊದಲ ನುಡಿಗೆ ಹೃದಯದಲ್ಲಿ

ಮುದದ ಹೊನಲು ಉಕ್ಕಲಿ.

ಮುದಿಜೀವವು ಹಿತವಾಡಲು

ಹದವರಿಯುತ ಹರಿಯಲಿ.

ಹಳತಿನೊಳಗ ಹೂಳ ತೆಗೆದು

ಒಳಿತುಗಳನು ಹೆರಕಲಿ.

ನಾಳೆಯೊಳಗೆ ನಿನ್ನೆ ಸೇರಿ

ಬೆಳಕ ಹೊತ್ತು ಮೆರೆಯಲಿ.

ಹೊಸತಾಗಲಿ ಪ್ರತಿನಿಮಿಷವು

ಹೊಸಗವಿತೆಯ ಹಾಡಲಿ.

ಹೊಸದೊಸಗೆಯು ತಾ ವಿಸರಿಸಿ

ಹೊಸ ಕಂಪನು ಸೂಸಲಿ.

ಡಿ.ನಂಜುಂಡ

30/12/2013

ಭಾವಗಳ ಸಿರಿಯಿರಲು ಬಡತನದ ಮಾತೇಕೆ?

ಭಾವಗಳ ಸಿರಿಯಿರಲು ಬಡತನದ ಮಾತೇಕೆ?

ಕಾವ್ಯಶರಧಿಯ ತೆರೆಗೆ ಮೌನವಿನ್ನೇಕೆ?

ನೋವು ನಲಿವಿನ ರಸವು ಚಿಮ್ಮುತಿರೆ ಸಮತೆಯಲಿ

ಕಾವುದೇತಕೆ ನಲ್ಲೆ!; ಹೃದಯಮಂಥನಕೆ

ಮಣ್ಣ ಕುಡಿಕೆಯ ಒಳಗೆ ಬೆಂದಿರುವ ಕಾಳುಗಳು

ಪ್ರಾಣಾಗ್ನಿಜ್ವಾಲೆಗಳ ಸಂತೈಸುತಿಹುದು

ಕಣ್ಣ ಕುಕ್ಕುವ ಹೊನ್ನು ಕಿಡಿಯನುಲ್ಬಣಗೊಳಿಸಿ

ಕ್ಷಣದಿ ಕರಗಿಸಿ ಸುಖವ ಬದುಕ ಸುಡಬಹುದು

ಗುಣಗಳನು ಸಂಕಲಿಸಿ ಮನದೊಳಗೆ ಸಂಸ್ಕರಿಸಿ

ಮಾನಾಪಮಾನಗಳ ಸಮತೂಕಗೊಳಿಸಿ

ಅನ್ನರಸದಾನಂದವೊಲವಾಗಿ ಒಸರಿಸಲಿ    

ಜನುಮಜನುಮದ ಋಣವ ಬಂಧದಲಿ ಇರಿಸಿ

ಬಾಳಿನೊಡತಿಯೆ! ನಿನ್ನ, ಕರೆಯುತಲಿ "ನನ ಚಿನ್ನ!"

ಓಲೆಯಲಿ ಮುತ್ತೊಂದ ಇರಿಸುವೆನು ಬೇಗ

ಚೆಲುವು ಮೂಡಲು ಮೊಗದಿ ನಗೆಹೂವ ಕುಡಿಯುವೆನು

ಬಲ್ಲಿದರು ಯಾರಿಲ್ಲಿ? ಹೇಳು ನೀ ಆಗ

ಡಿ.ನಂಜುಂಡ

24/12/2013

ಸುಂದರ ಉದ್ಯಾನ!

ಪಶ್ಚಿಮಘಟ್ಟವಿಶಾಲೋದ್ಯಾನದಿ

ನಿಶ್ಚಿತ ತನುಮನ ಸಂಭ್ರಮವು

ರೋಚಕ ದೃಶ್ಯಾವಳಿಸಂಕರ್ಷಿತ

ವಾಚನ ಪ್ರವಚನ ಗಾಯನವು

ಸಿಂಧೂರಾರುಣ ಪರ್ಣಸುಶೋಭಿತ

ಚಂದನಚರ್ಚಿತ ಮಂದಿರವು

ಮಂದಸ್ಮಿತಸುಮ ವರ್ಣವಿಭೂಷಿತ

ಸುಂದರ ವನಶುಭಸನ್ನಿಧಿಯು

ಗಿರಿಶೃಂಗಾನನ ಸಿಂಚಿತ ನಿರ್ಮಲ

ವರತುಂಗಾಜಲಮಾರ್ಜನವು

ಜರ್ಜರ ತರುಮೂಲೌಷಧಮಿಶ್ರಿತ

ತೀರ್ಥೋದಕಸಂಪ್ರಾಶನವು

ಹಿಮಮಣಿಮಾಲಾವೃತ ರಾಮಣ್ಯಕ

ನಿಮ್ನೋನ್ನತಪಥಚಾರಣವು

ಸುಮಮಧುಸಂಚಯನೋತ್ಸವ ವಿಲಸಿತ

ಭ್ರಮರಶ್ರುತಿಸಂಕೀರ್ತನವು

ಸೃಷ್ಟಿವಿಹಂಗಮ ಪರ್ವತಸಂಗಮ

ದೃಷ್ಟ್ಯಾಕರ್ಷಕ ದರ್ಶನವು

ವ್ಯಷ್ಟಿಸಮಷ್ಟಿಯ ಕೃತಿಸಂವೇಷ್ಟಿತ

ಇಷ್ಟಿಗೆ ಸಂತುಷ್ಟ್ಯಾಹುತಿಯು

ಡಿ.ನಂಜುಂಡ

23/12/2013

ಬಿಲ್ಲಾಗಿದೆ ತನುವು

ಚಳಿಯ ಗಾಳಿಗೆ ತನುವು ಬಾಗಿರೆ

ಹರನ ಬಿಲ್ಲಿನ ತೆರದಲಿ

ಹೊದ್ದು ಮಲಗುತ ನಿದ್ದೆ ಹೋದರು

ಮಂದಿಯೆಲ್ಲರು ಮನೆಯಲಿ

ಮೇಲಕೇಳುವ ಯತ್ನವೆಲ್ಲವು

ವಿಫಲವಾಗಲು ಮನದಲಿ

ಕಾಲ ಗಂಟನು ಎದೆಗೆ ಮುಟ್ಟಿಸಿ

ಯೋಗಿಯಾದರು ಕ್ಷಣದಲಿ

ಬಿಲ್ಲ ಹಗ್ಗವ ಪಿಡಿದು ಜಗ್ಗಲು

ಬಿಸಿಲಿನರಸನು ಬಾನಲಿ

ಹಲ್ಲ ಕಡಿಯುತ ಮೆಲ್ಲನೆದ್ದರು

ನಿಂತರೊಲೆಗಳ ಬದಿಯಲಿ

ಹರಿದು ಹಗ್ಗವು ಕೆಳಗೆ ಬೀಳಲು

ಸಂಜೆಗೆಂಪಿನ ಕಡಲಲಿ

ಹರಿಯ ಛಾಪಕೆ ಸಾಟಿಯಾಯಿತು

ಮತ್ತೆ ತನುವದು ಚಳಿಯಲಿ

ಡಿ.ನಂಜುಂಡ

22/12/2013

ಅಕ್ಷಿಯೊಳಗಣ ಸಾಕ್ಷಿಯಂಕುರ

ಇರುಳು ಕರಗುತಲೆದ್ದು ಕಸಗುಡಿಸಿ ಹಾಲ್ಕರೆದು

ಹೊರಟು ನಿಂತಳು ಬಡವಿ ಬನದಕಡೆಗೆ

ಬರಿಗಾಲ ನಡಿಗೆಯಲಿ ಹೊಕ್ಕಳಾ ಕಾಡೊಳಗೆ

ತರಗೆಲೆಯ ಗುಡಿಸಿ ತಾ ಹೊತ್ತುತರಲು

ಬಡತನದ ಬೇಗುದಿಗೆ ಒಡಲೆಲ್ಲ ಹದವಾಗಿ 

ನಡುವು ಬಳುಕಿದೆ ಬಾಗಿ ಮಣ್ಣಿನೆಡೆಗೆ

ಬಿಡದೆ ಬೆವರನು ಸುರಿಸಿ ದುಡಿಯುತಿರೆ ಅನುದಿನವು

ಗಡಿಗೆಯೊಳು ಬೇಯುತಿದೆ ಕಾಳುಕಡಿಯು

ಅಕ್ಷರದ ಸೋಂಕಿಲ್ಲ ಹೆಸರಿನಾ ಹಮ್ಮಿಲ್ಲ

ಕುಕ್ಷಿಯೊಳಗೆಚ್ಚರದ ಕಿಡಿಯು ಇರಲು

ಪಕ್ಷಿಯುದರದಿ ಬೆಂದ ಬೀಜಗಳ ತೆರದಲ್ಲಿ

ಅಕ್ಷಿಯೊಳಗಣ ಸಾಕ್ಷಿಯಂಕುರಿಪುದು

ಹುಟ್ಟಿನಿಂದಲೆ ಬಂದ ಕಷ್ಟಗಳ ಜ್ವಾಲೆಯದು

ಚಟ್ಟದೊಳು ಹೊಳೆಯುವುದು ಸುಖವನಿಟ್ಟು

ಇಷ್ಟಗಳ ಬೆನ್ನಟ್ಟಿ ಪಡೆದ ಮಮಕಾರಗಳು

ಸುಟ್ಟು ಬಿಡುವುವು ಸುಖವ ಕಟ್ಟಕಡೆಗೆ

ಇರುಳ ಕರಗಿಸಿ ರವಿಯು ಹೆರಲು ಹಗಲನು ನಿತ್ಯ

ಉರಿವ ಬೆಂಕಿಯು ಬೇಕು ಉದರದೊಳಗೆ

ಉರದೊಳಗೆ ತುಂಬಿರಲು ಇಲ್ಲಗಳ ಕಿಚ್ಚುಗಳು

ಇರುವುದೆಲ್ಲವು ಬೆಳಕು ಬಡವರೊಳಗೆ

ಡಿ.ನಂಜುಂಡ

7/12/2013