ವಿಫಲ

ಚಪ್ಪಲಿ ಹರಿಯಿತು ಶೂ ಗಮ್ ಬಿಟ್ಟಿತು

ನನ್ನಾವೇಗದ ನಡಿಗೆಯಲಿ

ಶರ್ಟ್ ಕೊಳೆಯಾಯಿತು ಪ್ಯಾಂಟ್ ಕಲೆಯಾಯಿತು

ಮೈಕೈಕಾಲಿನ ಬೆವರಿನಲಿ

ಹೊಟ್ಟೆಯ ಆ ಹೊರ ಸುತ್ತನು ಬಳಸಿಹ

ಕೊಬ್ಬತ್ತಿತ್ತಲುಗಲೆ ಇಲ್ಲ

ಮೀಟರುಗಟ್ಟಲೆ ಬಟ್ಟೆಗಳೆಲ್ಲವು

ಉಬ್ಬನು ಮರೆಮಾಚಲೆ ಇಲ್ಲ

ಸವಿಜೇನಿನ ಕೊಡ ಬರಿದಾಯ್ತು

ಲಿಂಬೆಯ ಮರವದು ಬೋಳಾಯ್ತು

ಬಿಸಿನೀರಿನ ಜೊತೆ ಎರಡೂ ಸೇರಿಸಿ

ಕುಡಿದಾ ಶ್ರಮವೂ ವೇಸ್ಟಾಯ್ತು

ಪ್ರಾಣಾಯಾಮದ ವೇಗೋತ್ಕರ್ಷಕೆ

ಮೂಗೊಳ ಹನಿಗಳು ಬರಿದಾಯ್ತು

ಧ್ಯಾನದೊಳೆದ್ದಿಹ ಒಳಮೈಯುಷ್ಣಕೆ

ಜೀರ್ಣದ ರಸ ದುಪ್ಪಟ್ಟಾಯ್ತು

ಮಾಡಿದ ಅಡುಗೆಗಳೆಲ್ಲವು ಖಾಲಿ

ಎದ್ದಿತು ತಿನ್ನುವ ಹಳೆಚಾಳಿ

ಉಬ್ಬಿದ ಹೊಟ್ಟೆಯ ಕೆಳಗಿಳಿಸುವ ಬಗೆ

ಇನ್ನೇನಿದೆಯೋ ನೀವ್ ಹೇಳಿ

ಡಿ.ನಂಜುಂಡ

26/12/2014