ಬೆರಗು

ಮನ ಕುಣಿವುದು ಮುಂಜಾನೆಯ ಮುಸುಗಿಗೆ

ಕಣ್ ತಣಿವುದು ಪ್ರತಿ ಸಂಜೆಯ ಕೆಂಪಿಗೆ

ಬೆರಗಾಗುವುದೀ ಸೃಷ್ಟಿಯ ಬೆಡಗಿಗೆ

ಛಂದಃಪ್ರಾಸವಿರಡಿಗಡಿಗೆ

ಸುಳಿದಾಡುವ ತಂಗಾಳಿಯ ಸ್ಪರ್ಶಕೆ

ಹರಿಯುವ ಹೊನಲಿನ ಬೆಳ್ನೊರೆ ನಗುವಿಗೆ

ಗುಡುಗಿಗೆ ಸಿಡಿಲಿಗೆ ಕಡಲಿನ ಮೊರೆತಕೆ

ವನಖಗಜಲಚರ ನಿಃಸ್ವನಕೆ

ಕುಸುಮಿತ ತರುಗಳ ಬಹುಫಲಭಾರಕೆ

ಗಿರಿಕಟಿಯಟವಿಯ ಮೈಕೈಮಾಟಕೆ

ಸರಸರ ಚಿಮ್ಮುವ ಚಿಗುರಗಳೋಟಕೆ

ಚಂದನಚರ್ಚಿತ ಘಮಘಮಕೆ

ಅನ್ನವ ಬೆಳೆಯುವ ಬುವಿ ತಾಯ್ತನಕೆ

ಚಿನ್ನವ ನೀಡುವ ಗಣಿನಿಸ್ಸ್ವಾರ್ಥಕೆ

ಕಾಣದ ಕೈಗಳ ಬಳೆಗಳ ನಾದಕೆ

ಶ್ರುತಿಲಯವಿರೆ ಪ್ರತಿಕಣಕಣಕೆ

ಡಿ.ನಂಜುಂಡ

27/12/2014