ಕಾಯಕ

ಕಡಲೆ ಹಿಟ್ಟಿಗೆ ನೀರನು ಬೆರೆಸಿ

ಉಪ್ಪು ಖಾರದ ಜೊತೆಯಲಿ ಕಲೆಸಿ

ಚಿಟಿಕೆ ಸೋಡವನದರೊಳಗುದುರಿಸಿ

ಹಸಿಮೆಣಸುಗಳನದ್ದಿದಳು

ತೊಟ್ಟನು ಹಿಡಿದು ಮೇಲಕೆ ಎತ್ತಿ

ಕುದಿಯುವ ಎಣ್ಣೆಯ ಒಳಗಡೆಗೊತ್ತಿ

ಸಟ್ಟಗವನ್ನು ಸೊಟ್ಟಗೆ ತಿರುಗಿಸಿ

ಆ ಕಡೆಗೀಕಡೆಗಟ್ಟಿದಳು

ಘಮ್ಮನೆ ಪರಿಮಳ ಬಂದೊಡನೆ

ಹದದುರಿಯೊಳಗವು ಬೆಂದೊಡನೆ

ಬಾಣಲೆ ಹೊರಗಡೆ ತಂದಿರಿಸಿದಳು

ನಮ್ಮೆಡೆಗೊಮ್ಮೆ ನೋಡಿದಳು

ಒಂದು ಎರಡು ಮೂರು ನಾಲ್ಕು

ಐದಾರೆನ್ನುತಲೆಣಿಸಿದಳು

ಕೊಟ್ಟೆಯೊಳಿಟ್ಟು ಕಟ್ಟಿದಳು

ಚಾಚಿದ ಕೈಮೇಲಿರಿಸಿದಳು

ನಾಲಗೆ ಚಪಲವ ಉಳ್ಳವರಿರಲಿ

ತಿನ್ನಲಿ ಬೋಂಡವ ದಿನದಿನವೂ

ಇಲ್ಲವರೆಲ್ಲರಿಗನ್ನವನೀಯಲಿ

ಬೋಂಡವ ಕರಿಯುವ ಕಾಯಕವು

ಡಿ.ನಂಜುಂಡ

14/12/2014