ಮಂಗಳವಾರ, ಜನವರಿ 8, 2013

ಮನಕರಗಿ ಅರಳಿತ್ತು ಹೃದಯದಲಿ ಹೂವು


ತಿಳಿನಗೆಯ ತೋಟದಲಿ ಅರಳಿರಲು ಹೂವೊಂದು
ಮನವೆಂಬ ಮರಿದುಂಬಿ ಜೇನನ್ನು ಹೀರಿ.
ಪರಿಮಳದ ಹೂವಿನಲಿ ಸಿಹಿಯನ್ನು ಸವಿಯುತಲಿ
ಮರೆತಿರಲು ಜಗದರಿವ ನಗುವ ಮತ್ತೇರಿ.

ಸವಿಯ ವ್ಯಸನದಿ ಅಲೆದು ಹುಡುಕಾಡಿ ನಗೆ ಹೂವ
ತೋಟವನು ಬೆಳೆಸಿರಲು ತನ್ನೊಳಗೆ ತಾನು.
ಮೊಗಬಿರಿದು ಹೂವುಗಳು ಸೊಗಸಾಗಿ ಅರಳಿರಲು
ಮಧುವನ್ನು ಸವಿಯತಿದೆ ತನ್ನನೇ ಮರೆತು.

ತನುವೆಲ್ಲ ಹೂವಾಗಿ ಕಣಕಣವು ಜೇನಾಗಿ
ತನ್ನನ್ನು ತಾನ್ ಕಳೆದು ನಗುವೊಂದೆ ಉಳಿದು.
ನಕ್ಕು ನಗಿಸುತ ನಲಿದು ಬದುಕೆಲ್ಲ ಹಗುರಾಗಿ
ಮನಕರಗಿ ಅರಳಿತ್ತು ಹೃದಯದಲಿ ಹೂವು.


ಕಾಮೆಂಟ್‌ಗಳಿಲ್ಲ:

ಕಾಮೆಂಟ್‌‌ ಪೋಸ್ಟ್‌ ಮಾಡಿ