ಈಗಲೇ ಬಾ, ಎದೆಗೂಡಿಗೆ!

ಒಂದು ದಿನ ತನುವಳಿದು

ನೆಲಕುರುಳಿ ಮಣ್ಣಾಗಿ

ಕಣ್ಣ ನೋಟವು ಕಳಚಿ ಕಾಣೆಯಾಗೆ

ಹೇಗೆ ನೋಡಲಿ ಅಂದು

ವನದೇವಿ! ನಿನ ಸೊಬಗ

ಈಗಲೇ ಬಾ ಎನ್ನ ಎದೆಗೂಡಿಗೆ

ಹಸಿರನುಸಿರಲಿ ತುಂಬಿ

ಕುಣಿಕುಣಿದು ನಲಿದಾಡು

ಉಲ್ಲಾಸರಸವುಕ್ಕಿ ಚಿಮ್ಮುವಂತೆ

ಕಣಕಣದಿ ಸಂಚರಿಸಿ

ಪ್ರೇಮದಂಕುರವಿರಿಸಿ

ಅಡಿಯಿಂದ ಮುಡಿಗೇರು ಬಳ್ಳಿಯಂತೆ

ಭಾವಲತೆಗಳು ಚಿಗುರಿ

ನಳನಳಿಪ ಪೂವಿಡಲಿ

ಬಾಳ ಹಾದಿಯ ತುಂಬ ಘಮಿಸುತಿರಲಿ

ಸುಖದುಃಖದೊಳಹೊಕ್ಕು

ಸಮಚಿತ್ತವೀಯುತಲಿ

ಮತಿಯ ಮಾತಿನ ತುದಿಗೆ ಫಲವನಿಡಲಿ

ಅನುಭವವು ಹಣ್ಣಾಗಿ

ತನುಭಾವವಳಿಯುತಿರೆ

ನಿತ್ಯಮುಕ್ತತೆಯರಿವು ಹರಿವಾಗಲಿ
ಮನದಾಳದೊಳು ಹೂತ

ಕೃತಕರ್ಮದುಳಿಕೆಗಳು

ಕೆಳಕುದುರಿ ನಿನ್ನಡಿಯ ಹುಡಿಯಾಗಲಿ.

ಡಿ.ನಂಜುಂಡ

01/06/2014