ಆಟ-ಪಾಠ

ಅಂಗಳಕಿಳಿದು ಆಡುತಲಿದ್ದರು

ಬಾಲಕರೆಲ್ಲರು ಒಂದಾಗಿ

ನೋಡುವ ಮನಗಳು ಆಗಸವೇರಿ

ತೇಲುತಲಿದ್ದವು ಹಗುರಾಗಿ

ಗೋಣಿಯ ದಾರವ ಬುಗುರಿಗೆ ಸುತ್ತಿ

ತಿರುಗಿಸಿ ಬಿಡುತಿರೆ ಜೋರಾಗಿ

ಎದೆಯೊಳಗವಿತಿಹ ನೋವುಗಳೆಲ್ಲವು

ಹೊರಕ್ಕೆ ಬಂದವು ಸುಖವಾಗಿ

ಐದಾರುಂಡಾ.. ಅರಪತಿಗಾಜ...

ಏಳಂಬೇಳೆ... ಎಂಟ್ ಮನೆ ಶುಂಠಿ...

ಒಂಬೈಗೋಲ... ತೇದಿಕು ತೇಲ..

ಎನ್ನುತ ಗೋಲಿಯನಾಡುತಿರೆ

ಲಾಭವ ಚಿಂತಿಪ ಲೋಭಿಗಳೆಲ್ಲರ

ಲೆಕ್ಕಗಳೆಲ್ಲವು ಮರೆಯಾಗಿ

ಆಟದ ಗೋಲಿಗಳೊಂದಿಗೆ ಬೆರೆತವು

ಓಟಕೆ ಸಹಪಾಠಿಗಳಾಗಿ

ಎಲ್ಲಾ ಮಕ್ಕಳು ನಲಿಯುತಲಾಡೆ

ಮನೆಯಂಗಳದಲಿ ಒಗ್ಗೂಡಿ

ದೊಡ್ಡವರೆಲ್ಲರು ಜಗಲಿಯನೇರಿ

ಕಲಿಯುತಲಿರಲಾಟವ ನೋಡಿ

ಹಾರುವ ಆಟ ಓಡುವ ಆಟ

ಪೇರಲೆ ಮರವನು ಏರುವ ಆಟ

ಕೂರುವ ಆಟ ನಿಲ್ಲುವ ಆಟ

ಸಾರಲಿ ಜೀವನ ಕಲೆಯಾಟ.

ಡಿ.ನಂಜುಂಡ

29/06/2014