ಸಹಜ

ಚೆಲ್ಲದಿಹುದೆ ಪ್ರಕೃತಿಯೊಲವು

ಎಲ್ಲರೆದೆಯೊಳಿಳಿಯದೇ?

ಬೇಲಿಯೆಲ್ಲೆ ಮೀರಿ ಹೂವು

ಗಾಳಿಯನ್ನು ತೀಡದೇ?

ಮಣ್ಣ ಕಣದ ಸಾರವೆಲ್ಲ

ಹಣ್ಣ ತಿರುಳಿಗೇರದೇ?

ಬಣ್ಣದಳೆದ ಬುವಿಯ ಚೆಲುವು

ಕಣ್ಣ ಸೆಳೆಯದಿರುವುದೇ?

ಮಳೆಯ ಹನಿಗಳಿಳೆಗೆ ಜಾರಿ

ಬೆಳೆಯು ಬಾಗದಿರುವುದೇ?

ಆಳಕಿಳಿದ ಜಲವು ಮತ್ತೆ

ಮೇಲಕೇರಿ ಬಾರದೇ?

ಕಾಲದÀಳತೆಯನ್ನು ಮೀರಿ

ನಾಳೆಯಿಂದಿಗಿಳಿವುದೇ?

ಬಾಳ ಗಾಲಿಯರೆಗಳುರುಳಿ

ಇಳಿದು ಮೇಲಕೇರದೇ?

ಎಲ್ಲ ಬೇಕು ಎಂಬ ಸೊಲ್ಲಿ-

ಗೆಲ್ಲಿ ನಿಯತಲಯವಿದೆ?

ಸೋಲು ಗೆಲುವು ಬಾರದೆಂದೂ

ತಾಳನಿಯಮವಿಲ್ಲದೆ.

ಡಿ.ನಂಜುಂಡ

15/10/2014