ವರಮಹಾಲಕ್ಷ್ಮೀ

ವರಮಹಾಲಕ್ಷ್ಮಿ ತವ ಚರಣಮಾಲಂಬೇ

ಸರಸಿಜಾನನೇ ಸರೋಜನಯನೇ ಅಂಬೇ

ವರಮಹಾಲಕ್ಷ್ಮಿ ತವ ಚರಣಮಾಲಂಬೇ

ಹರಿಮನೋಲ್ಲಾಸಿನಿ ಹರಿಹೃದಯವಾಸಿನಿ

ಹರಿನಾಮಸಂಕೀರ್ತನಾಲಿಂಗಿನಿ

ಹರಿಪದ್ಮಮಧುಸ್ವಾದಸಂವೇದಿನಿ

ಹರಿತತ್ತ್ವವಿಸ್ತಾರಸಂಚಾರಿಣಿ

ವರಮಹಾಲಕ್ಷ್ಮಿ ತವ ಚರಣಮಾಲಂಬೇ

ಸಂಚಿತಾಗಾಮಿಪ್ರಾರಬ್ದನಾಶಿನಿ

ವಾಂಚಿತಾರ್ಥಫಲದಾಯಿನಿ

ಪಂಚಾನನವಿರಿಂಚ್ಯಾದಿ ದೇವ ಪ್ರ-

ಪಂಚಧಾರಿಣಿ ತವ ಚರಣಮಾಲಂಬೇ

ಡಿ.ನಂಜುಂಡ

28/08/2015

ಮಳೆ ಸುರಿಯಲಿ

ಮಳೆ ಸುರಿಯಲಿ, ಹೊಳೆಕೆರೆಗಳು ನೆರೆಯಲಿ

ಮಕ್ಕಳು-ಮರಿಗಳು ಮನೆಯೊಳಗುಳಿಯಲಿ

ಹಾಗೂ ಹೀಗೂ ಶಾಲೆಗೆ ಹೊರಟರೆ

ಕೊಡೆಗಳ ಗಡಿಯಿಂದಾಚೆಗೆ ಹಾರಿಸಿ

ಪಾಟೀ ಚೀಲವ ತೋಯಿಸಲಿ

ತಲೆಮೇಲ್ ಗಂಗೆಯನಾಡಿಸಲಿ

ಭೋರ್ಗರೆಯುವ ನೀರ್ಗರೆತ ಸದ್ದಿಗೆ

ಅಪ್ಪಳಿಸುವ ಬಿರುಗಾಳಿಯ ಹೊಡೆತಕೆ

ಆಡಿದ ಮಾತುಗಳಾರಿಗೂ ಕೇಳದೆ

ಗುರುಗಳು ಪಾಠವನಲ್ಲೇ ನಿಲ್ಲಿಸಿ

ಶಾಲೆಗೆ ರಜೆಯನು ಘೋಷಿಸಲಿ

ಗದ್ದೆಯೊಳಗೆಯನು ಹಾಕಿಸಲಿ

ನದಿಗಳ ಅಣೆಗಳು ತುಂಬಲಿ ತುಳುಕಲಿ

ಕತ್ತಲೆಯಳಿಯಲಿ ದೀಪಗಳುರಿಯಲಿ

ಬರ ಪರಿಹಾರದ ಹಣ ಹಿಂತಿರುಗಲಿ

ಸರ್ಕಾರದ ತಲೆನೋವಳಿಯಲಿ 

ಸುಗ್ಗಿಯ ಪದಗಳನೊಕ್ಕಿಸಲಿ

ನಾಡಿನ ಬೊಕ್ಕಸವುಕ್ಕಿಸಲಿ

ಡಿ.ನಂಜುಂಡ

26/08/2015

ಬರ!

ಕಾರ್ಗಲ್ಲಿನ ಮೇಲಿಲ್ಲದೆ

ನೀರ್ಗರೆತದ ನೋಟ

ಕರುನಾಡಿನ ಗುಡಿಗುಡಿಯಲಿ

ಕಾರ್ಗತ್ತಲಿನಾಟ

ಕಾರ್ಮೋಡಗಳಾವರಿಸದೆ

ನೀರ್ಕೋಡಿಗಳಿಲ್ಲ

ನೀರಾಡದೆ ಬಿರುಬಿಟ್ಟಿವೆ

ಕಾರ್ಗದ್ದೆಗಳೆಲ್ಲ

ಮಲೆನಾಡಿನ ಪಡೆನುಡಿಗಳ

ಸಡಗರವಡಗಿಂತು

ಮಳೆಹಾಡಿನ ಲಯಗೆಟ್ಟಿರೆ

ಬೆಳೆ ಹಾಡುಗಳೆಂತು?

ಡಿ.ನಂಜುಂಡ

24/08/2015

ಉಸಿರೇ!

ನಿಯತ ಗತಿಯನು ತೊರೆದು ಓಡದಿರು ಎಲೆ ಉಸಿರೆ!

ನಿನ್ನ ತಾಳಕೆ ಕುಣಿವ ಮನಸ ನೋಡು

ನಿನ್ನಾಟ ನೆಗೆತಗಳ ಲಯಬದ್ಧಪಾಠವಿರೆ

ನೋವು ನಲಿವುಗಳೆಲ್ಲ ಮಧುರ ಹಾಡು

ಎದೆಯ ಭಾಗದಿ ನಿನ್ನ ಕುಣಿತದೇರಿಳಿತವಿರೆ

ಮನದೊಳಗೆ ಒತ್ತಡದÀ ಭರತವಾಗ

ಉದರಭಾಗವ ಹೊಕ್ಕು ನೀನಲ್ಲಿಯಾಡುತಿರೆ

ಚಣದೊಳಗೆ ಒತ್ತಡದ ಇಳಿತವಾಗ

ದಿನಗೆಲಸದಾ ಹೊತ್ತು ಆಲಸ್ಯವಾವರಿಸೆ

ನೀನೆದೆಯ ಮೇಲೇರಿ ಕುಣಿದು ನೋಡು

ಉತ್ಸಾಹದತಿರೇಕವಿರೆ ಉದರಕಿಳಿ ಬೇಗ

ಉದ್ವೇಗವಿಳಿಯುವುದು ಆಗ ನೋಡು

ಬೆಕ್ಕು ನಿದ್ರಿಸುವಾಗ ಅದರ ಹೊಟ್ಟೆಯ ನೋಡು

ದಿನವೂ ಮಲಗುವ ಹೊತ್ತು ನೀನಾಡು ಹಾಗೆ

ಇಲಿಯನಾಡಿಸಿ ಹಿಡಿವ ಬೆಕ್ಕಿನೆದೆಯನು ನೋಡು

ಚುರುಕಿನಾ ಗತಿಗಾಗಿ ಸಾಗು ಎದೆಯೊಳಗೆ

ಕಷ್ಟದಾ ಕೆಲಸವನು ಇಷ್ಟದಿಂದಲಿ ಮಾಡೆ

ಮನದ ಒತ್ತಡವಷ್ಟು ಇಳಿಯುವುದು ಬೇಗ

ಸೃಷ್ಟಿಯಂದದ ಒಟ್ಟು ಸೌಂದರ್ಯದಲಿ ಮುಳುಗೆ

ಸಮತೆಯಲಿ ನೀ ಹರಿವೆ ದೇಹದೊಳಗಾಗ

ಡಿ.ನಂಜುಂಡ

23/08/2015

ಅಕ್ಷರ

ಎದೆಯಾಳದಿ ಮಿಂದೆದ್ದಿಹ

ಮೆದುವಕ್ಕರವೊಂದು

ಮಧುಭಾವವ ತಂದಿತ್ತಿದೆ

ಪದಗೂಡುತಲಿಂದು

ರವಿಕಿರಣಗಳೋಕುಳಿಯಲಿ

ಬುವಿ ತಾ ಮುಳುಗಿರಲು

ಕವಿಕರ್ಷಿತ ನವಹರ್ಷದ

ಸವಿದೆನೆದೂಗಿರಲು

ಕರಿಗತ್ತಲ ತೆರೆಯ ಹರಿದು

ಕೆರೆಗಳ ಸುತ್ತುವರಿದು

ಓರೋರೆಯಲೋಲಾಡುತ

ನೀರ ಮೇಲೆ ಸರಿದು

ಬಾನಗಲದ ತಾನನವನು

ಕಾನನದೊಳು ತೂರಿ

ಬಾನಾಡಿಗಳಾನನದೊಳು

ತಾನೇಳಲು ಸೂರಿ

ಮುಂಜಾನೆಯ ಮಂಜ ಹರಿದು

ಸಂಜೆಗೆ ತಂಪ ಹೊಸೆದು

ನಂಜುಂಡನ ತಾಂಡವಕೆ

ಪಂಜಿನ ಬೆಳಕನೆಸೆದು

ಜಗವ ಸುತ್ತುತಿರಲು ಶಕುತಿ

ಗಗನಾಕ್ಷರದಾಕೃತಿ

ಮಗುವಂದದ ತೊದಲಿನಲ್ಲಿ

ಬಾಗಿತೇ ಕೃತಿ ಸಂತತಿ?

ಡಿ.ನಂಜುಂಡ

19/08/2015

ಮಾಂ ಪಾಹಿ ವಾಗ್ವಾಣಿ

ಮಾಂ ಪಾಹಿ ವಾಗ್ವಾಣಿ ಮಾಂ ಪಾಹಿ ಗೀರ್ವಾಣಿ

ಸಂಗೀತಸಾಮ್ರಾಜ್ಯಸಂಸ್ಥಾಪಿನಿ

ಬಹುಜನ್ಮಸಂಸಿದ್ಧಯೋಗೇನ ಸಂಸ್ಕರಿತ

ವಾಗರ್ಥಪದಬೀಜಸಂಗೋಪಿನಿ

ಆನಂದಫಲಭಾರಕಾವ್ಯಾಂಗಿನಿ

ಛಂದೋsಲಂಕಾರಸಂಚಾರಿಣಿ

ಪ್ರಾಸಾಕ್ಷರಾರೋಪಿತಾವರ್ತ ಲಾಲಿತ್ಯ

ಪರಿಪೂರ್ಣ ಪದವಾಕ್ಯಸಂಕರ್ಷಿಣಿ

ಜಗದೇಕ ಸೌಂದರ್ಯ ಘನರೂಪಿಣಿ

ಗಗನಾದಿಮಧ್ಯಾಂತಸಂಭಾಷಿಣಿ

ಓಂಕಾರ ನಾದಮಯ ಸ್ವರವರ್ಣ ಸಂಕ್ರಮಿತ

ವ್ಯೋಮಾಂತರಾಲಾಂತರಾರೋಹಿಣಿ

ಡಿ.ನಂಜುಂಡ

16/08/2015

ನಲ್ಲೆ

ನಲ್ಲೆಯು ತವರಿಗೆ ತೆರಳಿದಳೆಂದರೆ

ಮೊಲ್ಲೆಯ ಬಳ್ಳಿಯು ಬಾಡುವುದು

ಚೆಲ್ಲುವ ಪರಿಮಳಕೆಲ್ಲಿದೆ ಮುಕುತಿಯು?

ಸೊಲ್ಲಿನ ಶಕುತಿಯೂ ಕುಂದುವುದು

ಅಡಿಗೆಯ ಗಡಿಗೆಗಳಡಿಮೇಲಾಗಿ

ಗಡಿಬಿಡಿಗೆಲಸದಲೊಡೆಯುವುವು

ಬಡಿಸುವ ಕೈಬಳೆ ಮಿಡಿತವ ಕೇಳದೆ

ನುಡಿನಡೆಬೆಡಗುಗಳಳಿಯುವುವು

ಮಂಗಳ ರಂಗುಗಳಿಲ್ಲದ ಆ ಮನೆ-

ಯಂಗಳ ತಾ ಬಣಗುಟ್ಟುವುದು

ನುಂಗಲು ತಟ್ಟೆಯೊಳಿಟ್ಟಿಹ ಗಂಜಿಯು

ಚಂಗನೆ ತಿಪ್ಪಗೆ ಜಿಗಿಯುವುದು

ನಲ್ಲೆಯು ಮೆಲ್ಲನೆ ಮನೆಯೊಳಗಡಿಯಿಡೆ

ಗಲ್ಲದ ಹೂವಲ್ಲಾಡುವುದು

ಬೆಲ್ಲದ ಸವಿಯೋಡೋಡುತ ಬರುವುದು

ನಲ್ಲನ ಕೆನ್ನೆಯನಡರುವುದು 

ಡಿ.ನಂಜುಂಡ

16/08/2015

ಶ್ರಾವಣ

ಮಾವಿನ ತೋರಣ ಬೆಲ್ಲದ ಹೂರಣ

ಶ್ರಾವಣಮಾಸದ ಆಚರಣ

ದೇವರ ಗುಡಿಯೊಳು ಪುಷ್ಟಾವರಣ

ಘಂಟಾನಾದದ ಅನುರಣನ

ಜೀವನ ಯಾತ್ರಾಪಥಸಂಚಲನ

ಅನುದಿನ ನವವಿಧ ಸಂಕ್ರಮಣ

ಹೃದಯಸರೋಜದಿ ಮಧುರಸಪೂರಣ

ನವ ಉಲ್ಲಾಸದ ಹೊಂಗಿರಣ

ಗಿರಿಮುಖಚುಂಬಿತ ನೀರದನರ್ತನ

ಜಲಪಾದಗಳಾ ಸಂಚರಣ

ಹರಿಯುವ ಹೊನಲಿನ ಹರಿಸಂಕೀರ್ತನ

ಸಾಗರಶಯನದಿ ಸಂಗಮನ

ಡಿ.ನಂಜುಂಡ

15/08/2015

ಗಂಡನ ಪೂಜೆ

ಎಲ್ಲಿಗ್ ಹೋದ್ರೀ ಬನ್ರೀ ಇಲ್ಲಿ

ಪೂಜೇ ಮಾಡ್ಬೇಕು

ಅಮಾವಾಸ್ಯೇ ಮುಗೀದ್ರೋಳ್ಗೆ

ಪೂಜೆಯಾಗ್ಬೇಕು

ನಿನ್ನೇ ತಾನೇ ಹೇಳಿದ್ನಲ್ರೀ

ಹೂವನ್ ತರ್ಬೇಕು

ಕನ್ನಡ್ ದಲ್ಲೇ ಹೇಳಿಲ್ವೇನ್ರಿ

ಬೇಗಾ ಬರ್ಬೇಕು

ನಿಮ್ಮನ್ ಕಟ್ಕೊಂಡ್ ಸಾಕಾಗೋಯ್ತು

ಸುಮ್ನೆ ಕುಂತಿದ್ರಲ್ರೀ

ಹೋಳ್ಗೇ ಬೇಯ್ಸೀ ಕೊಡ್ಬಾರ್ದೇನ್ರೀ

ಗೊತ್ತಿದೆಯಂತಿದ್ರಲ್ರೀ

ಹೋತ್ತೂ ಗೊತ್ತೂ ಒಂದೂ ಇಲ್ಲ

ಲ್ಯಾಪ್ಟಾಪ್ ಬಿಚ್ಕೊಂತೀರಿ

ಕೂಗೀದ್ರೂನೂ ಗೊತ್ತಾಗೋಲ್ಲ

ನೋಡ್ಕೊಂಡ್ ಕುಂತಿರ್ತೀರಿ

ಬಡ್ಕೊಂಡ್ ಬಡ್ಕೊಂಡ್ ಸಾಕಾಗೋಯ್ತು

ಮೇಲೆದ್ ಬರೋದಿಲ್ಲ

ಫೇಸ್ ಬುಕ್ ಓದ್ತಾ ಕೂತ್ಕೊಂಡಿದ್ರೆ

ಸತ್ರೂ ನೋಡೋದಿಲ್ಲ

ಪಾದಾ ತೊಳ್ದೂ ಪೂಜೇ ಮಾಡೀ

ಕಣ್ಗೇ ಒತ್ಗೋಂತೀನ್ರೀ

ಲ್ಯಾಪ್ ಟಾಪ್ ಒದ್ದಾಕ್ ಬರ್ರೀ ಇಲ್ಲಿ

ಪುಣ್ಯಾ ಕಟ್ಕೋಂತೀನ್ರೀ

ಡಿ.ನಂಜುಂಡ

14/08/2015