ನಲ್ಲೆ

ನಲ್ಲೆಯು ತವರಿಗೆ ತೆರಳಿದಳೆಂದರೆ

ಮೊಲ್ಲೆಯ ಬಳ್ಳಿಯು ಬಾಡುವುದು

ಚೆಲ್ಲುವ ಪರಿಮಳಕೆಲ್ಲಿದೆ ಮುಕುತಿಯು?

ಸೊಲ್ಲಿನ ಶಕುತಿಯೂ ಕುಂದುವುದು

ಅಡಿಗೆಯ ಗಡಿಗೆಗಳಡಿಮೇಲಾಗಿ

ಗಡಿಬಿಡಿಗೆಲಸದಲೊಡೆಯುವುವು

ಬಡಿಸುವ ಕೈಬಳೆ ಮಿಡಿತವ ಕೇಳದೆ

ನುಡಿನಡೆಬೆಡಗುಗಳಳಿಯುವುವು

ಮಂಗಳ ರಂಗುಗಳಿಲ್ಲದ ಆ ಮನೆ-

ಯಂಗಳ ತಾ ಬಣಗುಟ್ಟುವುದು

ನುಂಗಲು ತಟ್ಟೆಯೊಳಿಟ್ಟಿಹ ಗಂಜಿಯು

ಚಂಗನೆ ತಿಪ್ಪಗೆ ಜಿಗಿಯುವುದು

ನಲ್ಲೆಯು ಮೆಲ್ಲನೆ ಮನೆಯೊಳಗಡಿಯಿಡೆ

ಗಲ್ಲದ ಹೂವಲ್ಲಾಡುವುದು

ಬೆಲ್ಲದ ಸವಿಯೋಡೋಡುತ ಬರುವುದು

ನಲ್ಲನ ಕೆನ್ನೆಯನಡರುವುದು 

ಡಿ.ನಂಜುಂಡ

16/08/2015