ಭಾವವಸಂತ
************
ಭಾವವಸಂತದ ನಾದೋತ್ಸವಕೆ
ಮೊಳಗಿದೆ ಹೃದಯದಿ ಓಂಕಾರ.
ರಾಗಾಲಾಪದ ಲಾಸ್ಯವಿಲಾಸಕೆ
ಮೊಳೆತಿದೆ ಮನಸಲಿ ಸಂಸ್ಕಾರ.
ಒಲವಿನ ಹಸಿರೆಲೆ
ಕುಡಿಕುಡಿಯಲ್ಲೂ
ನಾದತರಂಗದ ಸಂಚಾರ.
ಸ್ವರದೇರಿಳಿತದ ಅಲೆ
ಅಲೆಯಲ್ಲೂ
ನವವಿಧರಸಗಳ ಸಂಭಾರ.
ಮೊಗದಾ ನಗುವಿನ ಕುಸುಮದ
ಬಣ್ಣಕೆ
ನಯನವೆ ಚೆಲುವಿನ ಚಿತ್ತಾರ.
ಕುಸುಮದ ಅಧರದ ಮಧುವನು
ಸವಿಯಲು
ಚಿತ್ತಭ್ರಮರದ ಝೇಂಕಾರ.
ಕೊರಳಲಿ ಕೋಗಿಲೆ ಹಾಡಿದೆ
ರಾಗದಿ
ಬೆರೆತಾ ರಸವೇ ಶೃಂಗಾರ.
ಒಲವಿನ ಕಾವಿನ ಉಸಿರಾ
ಬಿಸಿಯಲಿ
ಮೊಗದಾ ಬಣ್ಣವು ಅಂಗಾರ.
ಕಾವ್ಯೋತ್ಸವದ ನವ ಉಲ್ಲಾಸಕೆ
ಕಣಕಣದಲ್ಲೂ ಹೂಂಕಾರ.
ವಿಧವಿಧ ರಸಗಳ ಕವಿತೆಯ ಉದಯಕೆ
ಬೀಜಾಕ್ಷರವೇ ಶ್ರೀಕಾರ.
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ