ಪದಬಿರಿದು ಬಾ ಸರಸತಿಯೆ (ಹೊಸ ಆವೃತ್ತಿ)

ಬಾ ಬೇಗ ಸರಸತಿಯೆ  ಸರಸಿಜಾತನ ಮತಿಯೆ
ಮತಿಯಲ್ಲಿ ಪದವಿರಿಸಿ  ಸರಸರನೆ ಬಾ.
ಲಯಗತಿಯ ನಡಿಗೆಯಲಿ ಮೃದುವಾದ ಪದವಿರಿಸಿ
ಹದವಾಗಿ ಕುಣಿಕುಣಿದು ಮನತಣಿಸು ಬಾ.

ಪದದುಡುಗೆ ಪದದೊಡವೆ ಕರದಲ್ಲಿ ಪದಮಾಲೆ
ವಧುವಂತೆ ಪದವರವ ನೀ ವರಿಸು ಬಾ.
ಹದವಾದ ಪದಗಳಲಿ ಸರಿಗಮದ ದನಿಯಿರಿಸಿ
ಕದತೆರದು ಪದಬಿರಿದು ಮುದದೋರು ಬಾ.

ಪದರತಿಯ ಸರಸದಲಮರಪದದ ಕೃಪೆಯಿರಿಸಿ
ಮಧುರರಸವನು  ಕೃತಿಕೃತಿಯಲಿರಿಸು ಬಾ.
ಮದಭರಿತ ಮತಿಯನವಿರತವು ನತಗೊಳಿಸಿ ಮೃದು-
ಪದಜಲದ ನದಿಯಾಗಿ  ನೀ ಹರಿದು ಬಾ.