ಬಾ ಗೆಳತಿ ಬಳಿ ಬಾರೆ ನೀ ಬಾಳಿನಾ ಒಡತಿ
ಹುಣ್ಣಿಮೆಯ ಚಂದಿರನ ಮೊಗವ ಹೊತ್ತು.
ಭಾವನೆಯ ಬಾಂದಳದಿ ಹೊಂಬೆಳಕ ಚೆಲ್ಲುತ್ತ
ಸೊಗ ತಾರೆ ಜಗದಗಲ ನಗುವ ಹೊತ್ತು
ನಗುಮೊಗದ ಚಂದಿರನ ಬಿಳಿಹಾಲ ನೊರೆಯಲ್ಲಿ
ನನ್ನೆದೆಯ ಹುಳಿಯೊಲವ ಹೆಪ್ಪುಬೆರೆಸಿ.
ಕಡೆದಿರುವೆ ಸಿಹಿಯೊಲವ ತೇಲುತಿಹ ಬೆಣ್ಣೆಯನು
ಕಾಯಿಸುವ ಬಾ ತುಟಿಗೆ ತುಟಿಯನಿರಿಸಿ.
ಬಾನಿನಾ ಚಂದಿರನು ಮೊಗದಲ್ಲೆ ಇರುವಾಗ
ಬಾಳಲ್ಲಿ ಬೆಳದಿಂಗಳಿನಾ ಹರಹು.
ನಗುವಿರಲು ಸೊಗವಿರಲು ಕಾಲದಾ ಮರೆವಿರಲು
ನಮಗಿಲ್ಲ ಸುತ್ತಲಿನ ಜಗದ ಅರಿವು.
ಸುಧಾಸಾಗರದಿ ಹುಟ್ಟಿದಾ ಚಂದಿರನ ತಾ
ಹೊತ್ತು ತಂಪಾಯಿತಾ ಶಿವನ ಬದುಕು.
ಸುಧಾಧಾರಾ ಸಿಂಚನದ ಮೊಗದ ಹೊಳಪಲ್ಲಿ
ಶಿವವಾಗುತಿದೆಯೆನ್ನ ಭಾವ- ಬದುಕು.
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ