ನಿತ್ಯಹರಿದ್ವರ್ಣ ಮಂದಿರ!

ತ್ರಿಭುವನಸುಂದರ! ಅತಿಶಯಬಂಧುರ!

ನಿತ್ಯಹರಿದ್ವರ್ಣ ಮಂದಿರ.

ವನಚರಚಾಲಿತ ತರಗೆಲೆಯಿಂಚರ;

ಸರಸರ ಸ್ವರತರ ಗಾಂಧಾರ.

ಶ್ರುತಿಹಿತಮಧುಕರಝೇಂಕಾರ;

ಶ್ರೀಶಿವಶಂಕರಿಸಂಚಾರ;

ಹಿಮಮಣಿಭೂಷಿತ ಸುಮರಸಸೇವಿತ

ದೇವಿಯ ಸುಂದರ ಅವತಾರ.

           

ಗಿರಿತಲನದಿಜಲಚಲನೆಯ ನಿಸ್ವನ;

ಜಲಚರಪಥದಲಿ ಅನುರಣನ.

ಧಾರಾವೃಷ್ಟಿಯ ತಟತಟ ತಾಳಕೆ

ನವಿಲಿನ ನರ್ತನಸಂಚಲನ.

ಧರಣೀಮಂಡಲದುದ್ಯಾನ;

ಆಹಾ! ಸುರಲೋಕಸಮಾನ!

ಅನುದಿನ ನಸುಕಿನ ವನಕವಿಗೋಷ್ಠಿಗೆ

ಪಂಚಮಸ್ವರದಲಿ ಪಿಕಗಾನ.

ಕುಸುಮಿತ ಗಿಡಗಳ ಚಿಗುರಲಿ ನವಶರ;

ಪ್ರಸವಿತ ತರುವಿಗೆ ತನುಭಾರ.

ನಾನಾಲತೆಗಳ ಮಂಟಪಮಧ್ಯದಿ

ಪತಂಗಯುಗಲದ ಶೃಂಗಾರ.

ರತಿಮನ್ಮಥಮಿಲನೋದ್ಗಾರ;

ಹರ್ಷೋತ್ಸವಕಾರ್ಯಾಗಾರ;

ಪುಲಕಿತಭೂರಮೆಯುದರದಿ ಅರ್ಪಿತ

ನವಬೀಜಾಂಕುರದುಪಚಾರ.

ಛಂದೋಮಯದಾ ಸೃಷ್ಟಿನಿಬಂಧದಿ

ಜೀವಾತ್ಮಗೆ ಸಾಕ್ಷಾತ್ಕಾರ.

ಸಂಚಿತ ಪುಣ್ಯವಿಪಾಕಕೆ ಫಲವಿದು

ಬ್ರಹ್ಮಾನಂದಾಮೃತಸಾರ.  

ಡಿ.ನಂಜುಂಡ

27/11/2013