ಆಸೆ

ಬೈಗುಗೆಂಪಿನ ಚೆಲುವಿನಾಗಸದ ಕೆಳಗಿಳಿದು

ಸಾಗರದಿ ಮುಳುಗುತಿಹ ರವಿಯಾಗುವಾಸೆ 

ರಾಗರಂಜಿತಭಾವಸಂಸ್ಕಾರಪದಗಳಲಿ

ಬಾಗುತಿಹ ಬಣ್ಣಗಳ ಪ್ರತಿಫಲಿಸುವಾಸೆ

ಮೂಡಣದ ಹೊಂಗಿರಣವೋಡೋಡಿ ಬರುವಾಗ

ಸಡಗರದಿ ನಭವೇರಿ ಹಾರಾಡುವಾಸೆ

ನಾಡ ಕನ್ನಡವಾಗಿ ಜನಮನದ ದನಿಯಾಗಿ

ಹಾಡಿಗನ ಪಡೆನುಡಿಯ ನಡೆಯಾಗುವಾಸೆ

ಮರಮರದಿ ಚಿಮ್ಮುತಿಹ ಚಿಗುರುಗಳಲಲ್ಲಲ್ಲಿ

ಉರದ ಕೆಂಪಿನ ಒಲವನಿರಿಸುವಾ ಆಸೆ

ಗಿರಿತಲದ ಹೊನಲುಗಳ ಹರಿವಾಗಿ ಹಾಲ್ಗರೆದು

ನೊರೆಯ ನಗುವಿನಲೊಮ್ಮೆ ಕರಗುವಾ ಆಸೆ  

ಬಾನೇರಿ ಮೇಘÀತನುವಾಗಿಳೆಯೆಡೆಗೆ ಬಾಗಿ

ವನದೇವಿಗಭಿಷೇಕಜಲವಾಗುವಾಸೆ

ಅಣುರೇಣುತೃಣಕಾಷ್ಠಬಂಧಗಳಲೊಂದಾಗಿ

ಕಣಕಣದಲಾನಂದಘನÀವಾಗುವಾಸೆ.