ಗೋವುಗಳ ಕರೆತಾರೊ ಗೋಪಾಲ

ಗೋವುಗಳ ಕರೆತಾರೊ ಗೋಪಾಲ

ಎನ್ನೊಳಗೆ ಇಹುದೊಂದು ಗೋಮಾಳ

ನಾನು ನನ್ನದು ಎಂಬ ಚಿಗುರುಗೂಟಗಳಿಂದ

ಕಟ್ಟಿರುವ ಬೇಲಿಯನು ಕಿತ್ತು ಹಾಕಿ

ಮಾತೆಂಬ ದಬ್ಬೆಗಳನೆರಡೆರಡು ಜೋಡಿಸುತ

ಬಿಗಿದಿರುವ ಕಟ್ಟುಗಳ ಬಿಚ್ಚಿ ಹಾಕಿ

ಗೋವುಗಳ ಕರೆತಾರೊ ಗೋಪಾಲ

ಪಂಚವಿಷಯಗಳೆಂಬ ಗೊಬ್ಬರವ ಸುರಿಸುರಿದು

ಹುಲುಸಾಗಿ ಬೆಳೆಸಿಹೆನು ಹುಲ್ಲುಗಳನು

ಗೋವುಗಳು ಅದ ಮೆಂದು ಬಾಲದಲ್ಲೋಡಿಸಲಿ

ಕಾವiಮೋಹಗಳೆಂಬ ಕೀಟಗಳನು

ಗೋವುಗಳ ಕರೆತಾರೊ ಗೋಪಾಲ

ಕಳೆಗಳೆಲ್ಲವ ಕಿತ್ತು ಗೋಮತಿಯನುತ್ತು

ನಿನಗಿಷ್ಟವಾದುದನೆ ಅಲ್ಲಿ ಬಿತ್ತು

ಬಂದ ಬೆಳೆಗಳನೆಲ್ಲ ನನ್ನಿಂದಲೊಕ್ಕಿಸುತ

ಎಲ್ಲರಿಗು ಹಂಚುತಲಿ ಮೇಲಕೆತ್ತು

ಗೋವುಗಳ ಕರೆತಾರೊ ಗೋಪಾಲ

ಡಿ.ನಂಜುಂಡ

30/07/2017