ಒಂದು ಪದ ಸಾಕು

ಒಂದು ಪದ ಸಾಕು, ನನ-

ಗೊಂದು ಪದ ಸಾಕು

ಅಂದ ಚಂದದ ಕೃಷ್ಣ-

ಪದವೊಂದೆ ಸಾಕು

ಭಾವಲತೆ ತಾ ಚಿಗುರಿ

ಚಿಮ್ಮುತೆಲ್ಲೆಡೆ ಹಬ್ಬಿ

ಹೂವ ಬಿಡುವಾ ಮೊದಲು ಸುತ್ತಲೇ ಬೇಕು 

ಯಾವ ಪದದೊಳು

ಕಷ್ಟಸುಖಗಳೆರಡಿಲ್ಲ ಆ

ಭಾವದರ್ಶನವೀವ ಪದವರಸಬೇಕು

ಅದು ಬೇಕು ಇದು ಬೇಕು

ಎಂಬರ್ಥ ಬಾರದಿಹ

ಪದಧೂಲಿಕಣವೊಂದು ಮೈಸೋಕಬೇಕು

ತೊದಲ ನುಡಿಗಳಲಾಡಿ

ಎದೆಯೆದೆಯಲೋಡಾಡಿ

ಮುದವೀವ ಮೊದಲ ಪದದೊಂದರ್ಥ ಸಾಕು

ಯಾವುದನು ಹೊಕ್ಕರ್ಥ

ಜಗದಗಲ ತಾ ಹರಹಿ

ನಾವು ನಮ್ಮದು ಎಂಬ ಮಮತೆಯಳಿಸಿಹುದೊ

ಭಾವದೊಳಗಾ ಅರ್ಥ-

ವೊಂದೆಯುಳಿದೆರಡಾಗಿ

ನೋವು ನಲಿವುಗಳಲ್ಲಿ ಹಲವಾಗುತಿಹುದೊ

ಅದು ಒಂದೆ ಸಾಕು ಕೃಷ್ಣ! ನಾ ಬಳಸಲು

ಪದವೊಂದೆ ಸಾಕು ನಿನ ಹಾಡಾಗಲು

ಡಿ.ನಂಜುಂಡ

31/07/2017