ಪಂಚಾಮೃತ

ಮಧುಪಾತ್ರೆಯೊಲು ಪಂಚವಿಷಯಾತ್ಮಕಾಯ

ಹದವಾಗಿ ತುಂಬಿರಲು ಗೀತಾರ್ಥಪೇಯ

ದೃಷ್ಟಿ ತಾ ಸೃಷ್ಟಿಸೌಂದರ್ಯವಂ ಸೆಳೆದು

ಅಷ್ಟದಲದಲಿ ಕುಣಿವ ಕೃಷ್ಣನನು ನೆನೆಯೆ

ಇಷ್ಟಕಷ್ಟÀಸುಮವೃಷ್ಟಿಯಿಂದರ್ಚಿಸುತ

ಇಷ್ಟಿಪರಿಪೂರ್ಣತೆಯ ಸಮದೃಷ್ಟಿಯೀಯೆ

ರಾಗರಂಜಿತಭಾವಮಾಧುರ್ಯಪದಗಳಲಿ

ಯೋಗೀಶ ಕೃಷ್ಣಲೀಲೆಗಳ ಸ್ತುತಿಸಿ

ಆಗುಹೋಗುಗಳನ್ನು ತ್ಯಾಗಲಯದಲಿ ಕೇಳೆ

ಯಾಗಕುಂಡದೊಲು ಕರ್ಣಗಳನಿರಿಸಿ

ಉಷ್ಣಶೀತಲಗಳನು ಸಮತೂಕದಲಿ ಬೆರೆಸಿ

ಕೃಷ್ಣಗಂಧವನರೆದು ಹರಹುತಿರೆ ಘಮವ

ವಿಷ್ಣುವಗಲಕು ನಾಸಿಕಾಗ್ರಗಳ ತೆರೆಯುತಲಿ

ತೃಷ್ಣೆಯೊಂದಿರೆ ಮುಖ್ಯಪ್ರಾಣನಂತಿರುವ

ಗೀತೆಯೊಳತಿಳಿವೆಳೆದು ಅಕ್ಷರಕೆ ಅದ ಬಿಗಿದು

ಮಾತುಗಳ ಕುಣಿಸುತಲಿ ಜಿಹ್ವೆಯದು ಜಿಗಿಯೆ

ಮಾತ ಮೈಯಳಿದರೂ  ಕೃಷ್ಣಪದದರ್ಥವದು

ಗಾಥೆಯಾಗುಳಿದೆಮ್ಮ ಚಿತ್ತದೊಳಗಿಳಿಯೆ

ಚರ್ಮ ತಾ ಸ್ಪರ್ಶಸುಖಸಾಮ್ರಾಜ್ಯವಾಳದೆಯೆ

ಧರ್ಮನಿರಪೇಕ್ಷ ಶ್ರೀಕೃಷ್ಣನಂತುಳಿಯೆ

ಕರ್ಮದಲಿ ಕಾಯ ತಾ ನಂಟು ಬೆಳೆಸದ ಹಾಗೆ

ಕರ್ಮಗೈಯುತ ಚರಮಗತಿಯೊಂದನರಿಯೆ

ಡಿ.ನಂಜುಂಡ

28/07/2017