ಮಲೆನಾಡ ಅಡವಿ

ಮಲೆನಾಡಿನಡವಿಯೊಳಗಲೆದಾಡು ಕುಣಿದಾಡು

ಒಲವ ಪ್ರತಿಮೆಗಳನೀನಲ್ಲಿ ನೋಡು 

ಚೆಲುವು ಚಲಿಸುವ ಕಾಡು ಲಲಿತ ಕಲೆಗಳ ಬೀಡು

ನಲವು ತಾನಲ್ಲಿ ನೆಲೆಸೆ ಎದೆತುಂಬಿ ಹಾಡು

ಎಲೆಗಳಲಿ ತಳಹಾಸಿ ಕೈಬೀಸಿ ಕರೆಯುತಿದೆ

ಫಲವಿರಿಸಿ ರೆಂಬೆಗಳನಿಳೆಗೆ ತಾಗಿಸಿದೆ

ಹೊಳೆ ತಾನು ಕೆಳ ಹಾರಿ ನಗೆಮೋರೆಯನು ತೋರಿ

ತಲೆಮೇಲೆ ಜಲವೆರಚಿ ಶುಭವ ಹರಸುತಿದೆ

ತಂಗಾಳಿಯನು ಬೀಸಿ ಹಸಿರುಸಿರನೆಮಗಿತ್ತು

ಅಂಗಾಂಗಗಳಿಗೆಲ್ಲ ಹುರಪನೂಡಿಸಿದೆ

ರಂಗುರಂಗುಗಳಲ್ಲಿ ನವಿಲುಗಳ ಸಿಂಗರಿಸಿ

ಶೃಂಗಾರಭಾವಗಳ ಕರೆದು ಕುಣಿಸುತಿದೆ

ಬೀಳುಗೀಳುಗಳಲ್ಲಿ ಮೇಲಮೇಲಕೆ ಸಾಗಿ

ಬಾಳ ಬೀಳನು ಮರೆವ ಆಟಗಳನಾಡು

ಆಲಬೇಲಗಳಲ್ಲಿ ನಾಳೆಯೇಳ್ಗೆಯ ಕಂಡು

ಬಾಲಬಾಲರ ಮುಂದೆ ನಾಡ ಕೊಂಡಾಡು.

ಡಿ.ನಂಜುಂಡ

12/07/2015