ಮಳೆನಾಡು

ಗಿರಿವನಗಳಿಗಪ್ಪಳಿಸಿಹ ಕಾರ್ಮೋಡದ ಬಿರುಹೊಡೆತಕೆ

ನಡುಹಗಲಲಿ ಧರೆಗಿಳಿದಿಹ ನಟ್ಟಿರುಳಿನ ಕಾಲ್ತುಳಿತಕೆ

ಕಾಣುವುದೆಲ್ಲವೂ ಕಾರ್ನಾಡು;

ಎಲ್ಲಿದೆ ನಮ್ಮಯ ಮಲೆನಾಡು

ಆಷಾಡದ ಜಿಹ್ವೆಯ ಮೇಲುದ್ಘೋಷಿತ ಶತರುದ್ರಕೆ

ಗೋರ್ಕಲ್ಲಲಿ ಮೈನೆರೆದಿಹ ಸುರಗಂಗೆಯ ಸಂಚಲನಕೆ

ಕೆನ್ನೀರೊಡೆದಿದೆ ಮಣ್ಣೊಲವು;

ಉಬ್ಬಿವೆ ಎಲ್ಲಾ ಹೊಳೆ ಹರಿವು

ಕಾಲುವೆಗಳ ಕಾಲೊಡಿದಿವೆ ಅಣೆಕಟ್ಟಿನ ಹಣೆಯೊಡೆದಿದೆ

ನಡು ರಸ್ತೆಯು ತುಸು ಹೆದರಿದೆ; ನೀರಾಳದಿ ತಾನಡಗಿದೆ 

ಕೆರೆಕಟ್ಟೆಯು ಬಿರುಬಿಟ್ಟಿರೆ ಇಲ್ಲಿ? 

ಒಗ್ಗೂಡುತಿರೆಲ್ಲಾ ಜಲವಿಲ್ಲಿ

ಎಲ್ಲಿದೆ ನಮ್ಮಯ ಮಲೆನಾಡು?

ನಮ್ಮೆದುರಿರುವುದು ಮಳೆನಾಡು

ಡಿ.ನಂಜುಂಡ

19/07/2015