ಬಾ ಮುಂಜಾನೆ !

ಮಂಜಿನ ಮುಂಜಾನೆಯೆ! ಹೊತ್ತು ತಾ ಬಗೆಬಗೆಯ

ಚಂದದಾ ಮಲ್ಲಿಗೆಯ ಹೂಗಂಧವ.

ಸುಂದರಿಯ ಮೆಲುಮಾತ ಕೇಳಿ ಬಾ ಮುಂಜಾನೆ!

ತಿಳಿಸೆನಗೆ ಬಲುಬೇಗ ಅವಳಂದವ.

ಮೊಗದಲ್ಲಿ ಅರಳಿರುವ ಮಲ್ಲಿಗೆಯ ನಗುವನ್ನೆ

ನಮ್ಮೂರ ಅಂಗಳದಿ ಚೆಲ್ಲಿರುವಳು.

ಮರಮರದಿ ಹಬ್ಬಿದಾ ಮಲ್ಲಿಗೆಹೂಬಳ್ಳಿಗೆ

ನಗುಮೊಗದ ಚಲುವನ್ನು ತುಂಬಿರುವಳು.

ಚಂದಿರನ ಬಿಳಿಹಾಲ ನೊರೆಯಲ್ಲಿ ಮಿಂದಿಹಳು

ನಸುಗೆಂಪು ಕೆನ್ನೆಯನು ಹೊಂದಿರುವಳು.

ಮೂಡಣ ದಿಕ್ಕ ನೋಡಿ ತಲೆಬಾಗಿ ಕೈಮುಗಿದು

ಆಗಸದಿ ಹೊಂಬಣ್ಣ ಬಳಿದಿರುವಳು.

ಹಸಿರಾದ ಮರಗಳಿಗೆ ಸೌಂದರ್ಯ ತುಂಬಿಹಳು

ಹೊಸಹಸಿರ ಅಂಬರವ ತೊಟ್ಟಿರುವಳು.

ಹಕ್ಕಿಗಳಾ ಕೊರಳಿನಲಿ ಇಂಪನ್ನು ಬೆಸೆಯುತಲಿ

ಸರಿಗಮದ ಅಲೆಯಲ್ಲಿ ತೇಲುತಿಹಳು.

ಎಲ್ಲೆಲ್ಲು  ಮಲ್ಲಿಗೆಯ ಪರಿಮಳವ ಬೀರಿಹಳು

ಒಲವಿನಾ ಬಳ್ಳಿಯನು ತಬ್ಬಿರುವಳು.

ಹಿತವಾದ ಮೆಲುದನಿಯ ಕೇಳಿ ಬಾ ಮುಂಜಾನೆ!

ಜಗತುಂಬ ಹೊಸಹುರುಪ ಹಬ್ಬಿರುವಳು.