ಹೊಂದಿಸಿ ಬರೆ, ಬಾ ಮನದೊಡತಿ!

ಒಲವಿನ ಕವಿತೆಗೆ ಸುಂದರ ಪದಗಳ  

ಹೊಂದಿಸಿ ಬರೆ, ಬಾ ಮನದೊಡತಿ!

ಬಿಟ್ಟಿಹ ಶಬ್ದವ ಜೋಡಿಸು ಎದೆಯಲಿ

ಹೊಸಮಟ್ಟನು ತಾ ಸಂಗಾತಿ.

ಕಣ್ಣೊಳು ಕೇಳಿಹ ನನ್ನಯ ಪ್ರಶ್ನೆಗೆ

ಒಂದೇ ಪದದಲಿ ಉತ್ತರಿಸು.

ಬಾಳಿನ ಪುಟಗಳ ಅಂದದಿ ತುಂಬಿಸಿ

ದೀರ್ಘ ಪ್ರಬಂಧವ ನೀ ಲಿಖಿಸು.

ಗಾದೆಯ ಮಾತಿನ ವಿಶೇಷ ಸಾರುತ

ನುಡಿಗಟ್ಟುಗಳನು ನೀ ಬಿಡಿಸು.

ಎಡವಿದ ಚರಣ-ಸಂದರ್ಭವ ತಿಳಿಸುತ

ಕಾರಣಸಹಿತಾ ವಿವರಿಸು.

ಕಠಿಣ ಪದಗಳಿಗೆ ಅರ್ಥವ ತಿಳಿಸುತ

ಪಲ್ಲವಿಯೊಂದನು ನೀ ರಚಿಸು.

ಹೊಸಹೊಸ ರಾಗವ ಹೊಸೆದಿಹ ನುಡಿಗಳ

ನನ್ನಯ ಕಿವಿಯಲಿ ಗುನುಗುನಿಸು