ತಾಳ್ಮೆಯೊಡಲು

ನೊಂದು ಸುರಿಸಿದ ಹೆಣ್ಣ ಕಣ್ಣೀರ ಧಾರೆಯದು

ಇಳೆಯಲ್ಲಿ ತಾ ಇಂಗಿ ಹರಿವಾಗಿದೆ

ತಾಳ್ಮೆಯಲಿ ಭೂಮಾತೆಯೊಡಲಿನಲಿ ಸೋಸಿರಲು

ಕೊಳಗಳಲಿ ಸಿಹಿನೀರ ಸೆಲೆಯುಕ್ಕಿದೆ

ಸ್ತ್ರೀಕುಲದ ಕಣ್ಣೀರ ಧಾರೆಯದು ನೆಲಕಿಳಿದು

ಜಾನಕಿಯ ರೂಪದಲಿ ಬುವಿಯಿಂದ ಭವಿಸೆ

ರಾಣಿಯಾಗಿಯೂ ತಾನು ಮುಳ್ಳು ಹಾದಿಯ ಸವೆಸಿ

ಅಪಹರಣಕೊಳಗಾಗಿ ಕಂಬನಿಯ ಸುರಿಸೆ

ಅವರಿವರ ಮಾತುಗಳ ಅರಸ ತಾ ಕೇಳುತಲಿ

ತನ್ನರಸಿಯನು ಮತ್ತೆ ವನವಾಸಗೊಳಿಸೆ

ಅನುಮಾನದಲಿ ಪತಿಯೇ ಅವಮಾನಗೊಳಿಸುತಿರೆ

ಅವನಿಮಾತೆಯು ತಾನೇ ಮಗಳ ಸ್ವೀಕರಿಸೆ

ಮನಸಿನಿಂದಲೆ ಸತಿಯ ದೂರಗೊಳಿಸುತಲಿರಲು

ಅಡಿಗಡಿಗೆ ಬೇಯುತಲಿ ಅಳುಸುರಿಸುತಿರಲು

ಕಂಬನಿಯ ಕೋಡಿಗಳು ಮಣ್ಣನ್ನು ತೋಯಿಸುತ

ಬುವಿಯಾಳಕಿಳಿದುಕ್ಕಿ ಕಡಲಿನೊಳು ಬರಲು.

ಡಿ.ನಂಜುಂಡ

19/04/2014