ಬಳುಕಿ ಬಳುಕಿ ಮೈಕುಲುಕಿ ನಡೆವಾ
ಬಿನ್ನಾಣಗಿತ್ತಿಯ ನೋಡಿದೆನು.
ಹಚ್ಚ ಹಸುರಿನ ಹೊಲದ ಬದಿಯಲಿ
ಅಂದಗಾತಿಯ ನೋಡಿದೆನು.
ನೋಡಿದೆನು, ನಾ ಹಿಂದೆ ಓಡಿದೆನು.
ಮುಳ್ಳ ಪೊದೆಯಲಿ ಮೈಯ ಬಗ್ಗಿಸಿ
ನುಸುಳಿ ಹೆಜ್ಜೆಯನಿಟ್ಟವಳ.
ಕಲ್ಲು ಬಂಡೆಯ ಸುತ್ತ ಸುತ್ತುತ
ಆಟವನಾಡಿ ನಕ್ಕವಳ.
ಮುಗಿಲು ಸುರಿಸಿದಾ ಜಡಿಮಳೆಯಲಿ
ಮೈಯನುಬ್ಬಿಸಿ ನಡೆದವಳ.
ಕಣ್ಣ ಸೆಳೆಯುವ ಕೆಮ್ಮಣ್ಣಿನ
ಬಣ್ಣದುಡುಗೆಯ ತೊಟ್ಟವಳ.
ಬಿಸಿಲ ಅರಸಗೆ ಮೈಯ ತೋರುವ
ಸೊಬಗ ಸೀರೆಯನುಟ್ಟವಳ.
ಒಣಗಿದ ತೊಗಲಿನ ಕಡುಬಡವಗೂ
ತನ್ನೊಡಲ ಬಳಸಲು ಬಿಟ್ಟವಳ.
ಹಸುವ ಕಾಯುವ ಕೂಸ ಪೊರೆಯಲು
ಒಡಲ ಸೀಳೇ ಬಿಟ್ಟವಳ.
ಕೂಸಿನ ತೆರದಲ್ಲೆಲ್ಲರ ಕಂಡು
ತನ್ನತ್ತವರನು ಕರೆದವಳ.
ಕಡಲ ನೀರಲಿ ಉಡುಗೆಯ ಕಳಚಿ
ಅಂದದೊಡಲೂ ತೊರೆದವಳ.
ತೊರೆದ ಒಡಲನು ಮತ್ತೆ ಪಡೆಯಲು
ಮುಗಿಲನೇರಿ ಕುಳಿತವಳ.
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ