ಪ್ರಕೃತಿ ಬರೆದ ಕವಿತೆ

ಪ್ರಕೃತಿಯ ಕವಿತೆಯ ಪಲ್ಲವಿ ಹಾಡಿವೆ

ಚಿಲಿಪಿಲಿಗುಟ್ಟುವ ಹಕ್ಕಿಗಳು.

ಮೃದುಮಧು ನುಡಿಗಳ ಬರೆದಿವೆ ಬನದಲಿ

ಹಸುರಿನ ಹೊಸಹೊಸ ಚಿಗುರುಗಳು.

ಗಿರಿವನದಡಿಯಲಿ  ಸರಸರ ಸ್ವನದಲಿ

ಹೊಸೆದಿವೆ ಹಾಡನು ಹೊನಲುಗಳು.

ಹೊಸಹೊಸ ರಾಗವ ಕೊರಳಲಿ ಉಲಿದಿವೆ

ಮಾಮರದೊಳಗಿನ  ಕುಕಿಲಗಳು.

ಸುಮಧುರ ನುಡಿಗಳ ಲಯದಲಿ ಕುಣಿದಿವೆ

ಅಂದದ  ಚಂದದ ನವಿಲುಗಳು.

ಮೃದುಚರಣಗಳಲಿ ಬಳುಕುತ ತೇಲಿವೆ

ಕಿರುತೆರೆ ಮೇಲಿನ ಹಂಸಗಳು.

ಕವಿಗಳ ಕಲ್ಪನೆ ಕುಣಿದಿದೆ ಹರುಷದಿ

ಅನುದಿನ ನಸುಕಿನ ಕವಿತೆಯಲಿ.

ಹೊಸಹೊಸ ನುಡಿಗಳ ಗುನುಗಿದೆ ಹೃದಯವು

ಪ್ರಕೃತಿಯ ವಸಂತರಾಗದಲಿ.