ಹರಿದ ಸೂತ್ರ!

ಅಧಿಕಾರ ಭ್ರಷ್ಟತೆಗೆ ಅಂಕುಶವು ಏಕಿಲ್ಲ?

ಆತಂಕ ಕಾಡುತಿರೆ ರಾಜ್ಯದಲ್ಲಿ.

ಅವನಿಕಾಯುವ ದೇವ ಸುಮ್ಮನಾಗಿಹನೇಕೆ?

ಪಾಪಪುಣ್ಯದ ಲೆಕ್ಕ ಪತ್ರವೆಲ್ಲಿ?

ಗಣರಾಜ್ಯವಿದೆಯಲ್ಲಿ ಜನಸೂತ್ರ ಸಾಕೆಂದು

ತಾ ಸೂತ್ರ ಹರಿಬಿಟ್ಟು ನೋಡುತಿಹನೆ?

ಭ್ರಷ್ಟತೆಯ ಪಟವಿಲ್ಲಿ ಹಾರುತಿರೆ ಗಗನದಲಿ

ಆ ದೇವ ಗಾಳಿಪಟ ಆಡುತಿಹನೆ?

ಪಟ್ಟವೇರಿದ ರಾಜ ಅಟ್ಟಹಾಸದಿ ಮೆರೆಯೆ

ಹೋಯಿತೆಲ್ಲಿಗೆ ನಮ್ಮ ರಾಜ್ಯಸೂತ್ರ?

ಕಲಿಗಾಲವಿದೆಯಲ್ಲಿ ಕಲಿನಿಯಮ ಸಾಕೆಂದು

ಹರಿದುಬಿಟ್ಟಿದೆಯೇನು ಜಗದಸೂತ್ರ?

ಚಟ್ಟವೇರಿದ ರಾಜ ಹೊತ್ತೊಯ್ಯುವನೆ ಗಂಟ?

ಮತ್ತೇಕೆ ಭ್ರಷ್ಟತನ ಬಿಡಬಾರದೆ?

ಸುಡುಗಾಡ ಕಟ್ಟಿಗೆಯು ಸುಟ್ಟೀತೆ ಕೃತಕರ್ಮ!?

ಪ್ರಾರಬ್ಧ ಫಲವಾಗಿ ಸುಡಲಾರದೆ?