ನಟ-ನಟನೆ-ನೋಡುಗ

ನೋವು ನಲಿವಿನ ಅಲೆಯು ಮನಸಿನಲಿ ಪುಟಿದೆದ್ದ

ನೀರಗುಳ್ಳೆಯ ತೆರದಿ ಕ್ಷಣಿಕವೆಲ್ಲ.

ನೋವಿನಾ ಅಸ್ತಿತ್ತ್ವ ನಲಿವಿನಲ್ಲಿಯೆ ದಿಟವು

ನಲಿವನದು ನೋವಿನಲಿ ಇರುವುದೆಲ್ಲ.

ನೋವುನಲಿವಿನ ಅರಿವು ಸಾಪೇಕ್ಷವಾಗಿಹುದು

ಭಾವತೀವ್ರತೆಯ ತೀರ್ಮಾನದಂತೆ.

ಭಾವದೊಡಲಿನ ತಳದ ಶಾಂತದರಿವಲಿ ನೆಲೆಸೆ

ನಿರಪೇಕ್ಷವಿಸ್ತಾರ ಅನಂತವೆಲ್ಲ.

ನೋವು ನಲಿವಿನ ಅಲೆಯ ಸಾಕ್ಷಿಭಾವದಿ ನೋಡೆ

ಕಿರುಪರದೆ ಮೇಲಿಹುದು ನಟನೆ ಎಲ್ಲ.

ತನ್ನ ನಟನೆಯ ತಾನೆ ಮೌನದಲಿ ನೋಡುತಿರೆ

ನಟನಿಲ್ಲವಲ್ಲಿ ನೋಡುಗನೆ ಎಲ್ಲ.

ನೋಡುಗನೆ ಓಡಿದರೆ ಓಟ ನೋಡಲು ಕಷ್ಟ

ನಿಂತು ನೋಡಲು ಓಟ ಇಲ್ಲ ಅಲ್ಲಿ.

ಓಡುಗನ ಓಟವನು ನಿಂತು ನೋಡುವ ಭಾವ

ಉದಯಿಸಲು ನಮ್ಮೊಳಗೆ ಶಾಂತವೆಲ್ಲ.