ಸ್ಥಿರಚಲನೆಗಳೆರಡು ಶಿವಗಿರಿಜೆಯರಂತೆ

ಮನಸು ಚಲಿಸಲು ಗಿರಿಜೆ

ಮನಸು ನಿಲ್ಲಲು ಶಿವವು

ಶಿವಗಿರಿಜೆಯೆರಡೊಂದೆ ಬೇಧವಿಲ್ಲ.

ಮೌನಶಿವ ನೋಡುವನು

ಮನದ ಪರದೆಯ ಮೇಲೆ

ತನ್ನಾತ್ಮಗಿರಿಜೆಯನು- ನಾಟ್ಯ ಎಲ್ಲ.

ಚಲನೆಯದು ವಿಸ್ತರಿಸಿ 

ಸೃಷ್ಟಿಯಾಗಿದೆ ಜಗದಿ

ಚಲನರಹಿತನ ಮನದ ಪರದೆಯಲ್ಲಿ.

ತನ್ನ ಚಲನೆಯ ತಾನೆ

ಮನದ ಅಲೆಯಲಿ ಕಂಡು

ಶಿವನು ಕುಳಿತಿಹ ಮೌನಶರಧಿಯಲ್ಲಿ

ಚಲನೆಯಾಡಿದ ನಾಟ್ಯ

ಗಿರಿಜೆಯೆಂಬುದೆ ದಿಟವು

ಮನದ ಸೃಷ್ಟಿಯ ಬಣ್ಣ ವೈವಿಧ್ಯವು.

ಚಲನರಹಿತವೆ ಮೌನ

ಶಿವನೆಂಬ ಸ್ಥಿರತತ್ತ್ವ

ನಿಂತು ನೋಡಲು ಅಲ್ಲೆ- ಸಾನ್ನಿಧ್ಯವು.